Jurnalistlarning Kasb etikasi kodeksi qabul qilinadi: uni buzgan jurnalistlar javobgarlikka tortiladi

Fuqarolarning xolis, ishonchli axborot olishlari, shuningdek, jurnalistlarning fikrlar xilma-xilligini inobatga olgan holda haqqoniy va obektiv ma'lumot tayyorlashi va ularni yetkazishini ta'minlash maqsadida jurnalistlarning kasb etikasi kodeksi ishlab chiqilmoqda.

Axborot va ommaviy kommunikatsiyalar agentligi xabariga ko‘ra, bu ommaviy axborot vositalarining o‘z-o‘zini boshqarish usuli bo‘lib, bu borada hech qanday sud yoki vakolatli davlat idoralari aralashmaydi.

Kodeks asosida jurnalistlarning sifatli axborot yetkazishda mas'uliyatlarini oshirish ko‘zda tutilgan.

Jurnalistlarning kasbiy majburiyatlari, ularning mas'uliyatlarini himoyalash, halol raqobat va jurnalistlar birdamligi – kodeksning bosh tamoyillaridan hisoblanadi.

Jurnalistlarning Kasb etikasi kodeksi prinsiplari va normalarini buzgan jurnalistlar kodeksda belgilangan tartibga ko‘ra javobgarlikka tortiladilar.

Kodeks "Inson huquqlari umumjahon deklaratsiyasi" (BMT Bosh Assambleyasi, 1948 yil), "Xalqaro jurnalistika professional etika tamoyillari" (YuNeSKO, 1983 yil), «Xalqaro jurnalist axloqi tamoyillari deklaratsiyasi» (Xalqaro jurnalistlar federatsiyasining Jahon kongressi, 1954 yil) kabi hujjatlar va O‘zbekiston Respublikasi Konstitutsiyasi hamda qonunchiligi qoidalari asosida ishlab chiqilmoqda.