Kurash. Endi Osiyo o‘yinlarida 7ta emas, 17ta medallar jamlanmasi o‘ynaladi

Bugun, 25 fevral kuni Milliy olimpiya qo‘mitasi prezidenti Umid Ahmadjonov Toshkentdagi «Hyatt Regency» mehmonxonasida Xalqaro Kurash Assotsiatsiyasi prezidenti, Osiyo Olimpiya Kengashining Osiyo o‘yinlari departamenti direktori Haydar Farmon bilan uchrashuv o‘tkazdi. Unda o‘zbek milliy sporti hisoblangan kurashning Osiyo o‘yinlaridagi o‘rnini mustahkamlash yo‘lida muzokaralar olib borildi.

Uchrashuvda MOQ rahbari musobaqaning kurash bo‘yicha bahslarida vaznlar toifasini ko‘paytirish g‘oyasini ilgari surdi. Ushbu taklif Xalqaro kurash assotsiatsiyasi prezidenti tomonidan ham qo‘llab-quvvatlandi. Bu bo‘yicha Osiyo Olimpiya Kengashi xulosasi Hanchjou-2022, Nagoya-2026 o‘yinlari tashkiliy qo‘mitasiga ham yuborildi.

Uchrashuv yakunlariga ko‘ra, 2022 yilgi Osiyo o‘yinlaridan boshlab kurash 15ta vazn toifasida (7ta erkaklar, 8ta ayollar) tashkil etiladi. Shuningdek, erkaklar va ayollar o‘rtasida jamoaviy bellashuvlar ham o‘yinlar dasturidan o‘rin oladi. Shu tariqa, o‘zbek milliy sporti nufuzi Osiyo o‘yinlarida yanada ko‘tariladi va kurash bahslarda umumiy hisobda 17ta medallar jamlanmasi o‘ynaladi.

Haydar Farmon kecha, 24 fevral kuni Osiyo Olimpiya Kengashi prezidenti Shayx Ahmad Al-Fahad As-Saboh boshchiligidagi delegatsiya tarkibida O‘zbekistonga tashrif buyurgan.

Eslatib o‘tamiz, 2018 yilgi Osiyo o‘yinlarida kurash ilk marotaba musobaqa dasturidan o‘rin oldi. Indoneziya mezbonlik qilgan o‘yinlarda milliy sportimiz bo‘yicha 7ta vazn toifasida bahslar tashkil qilindi. 

Osiyo o‘yinlarida 7ta vazn toifasida (4ta erkaklar, 3ta ayollar) bellashuvlar o‘tkazilgan. Musobaqada yurtimiz sharafini himoya qilgan 14 sportchidan 12 nafari medallarga sazovor bo‘lgandi.