«Bunyodkor» bosh direktori: «Klubning avvalgi mavqeyini qaytarishga va'da beramiz»

«Bunyodkor» bosh direktori vazifasini bajaruvchi Ulug‘bek Mirzayev yangi mavsum arafasida o‘z fikrlari bilan o‘rtoqlashdi.

«Avvalambor, turli mish-mishlarga qaramasdan «Bunyodkor» Superligadagi o‘z o‘rnini saqlab qolganligi bilan klub muxlislarini, ishqibozlarini tabriklayman. Tan olish kerak, mavsumlar oralig‘idagi tanaffus biz uchun juda og‘ir kechdi. Xabaringiz bor, so‘nggi vaqtlarda klub atrofidagi salbiy mish-mishlar, turli gap-so‘zlar me'yoridan ham ortib ketdi. Ko‘pchilik futbol muxlislarida jamoamiz bu yil Superligada ishtirok etmas ekan, degan fikrlar uyg‘ongan edi. Biroq, shukrki, unday bo‘lib chiqmadi. Buning uchun O‘zbekiston futbol assotsiatsiyasi hamda Professional futbol ligasiga alohida minnatdorchilik bildiramiz. Sababi «Bunyodkor»ning tarixi, klubning mavqei, uning xalqaro arenadagi obro‘sini hamda so‘nggi vaqtlarda klubda amalga oshirilgan ijobiy o‘zgarishlar va bajarilayotgan ishlarni inobatga olgan O‘FA Klublarni litsenziyalash bo‘limi Superligada ishtirok etadigan 14 jamoa safiga kiritdi.

O‘ylaymanki, avval bo‘lgani kabi bundan keyin ham «Bunyodkor» reglamentda belgilangan vazifalar va talablarga jiddiy e'tibor qaratadi hamda boshqa klublarga bu borada o‘rnak bo‘lib namuna ko‘rsatishga harakat qiladi. Klubimiz nafaqat nazariy jihatdan, balki amaliy jihatdan ham doimiy tarzda o‘z so‘zini aytishga intiladi. Shuningdek, Vadim Abramov boshchiligida yashil maydondagi natijalarimiz bilan «Bunyodkor»ning avvalgi mavqeyini qaytarib, muxlislarni xursand qilishga va'da beramiz.

Hozirgi kunda tarkibimiz ancha yoshargan, tajribali futbolchilarimiz klubni tark etdi. Biroq, biz shu yoshlarimiz bilan ham «Bunyodkor»ning sharafini munosib himoya qilamiz.

Qur'aga keladigan bo‘lsak, Superliga ikki davrada o‘tkaziladi, ikki davra davomida barcha klublarga qarshi ikki martadan o‘ynaymiz. Shu sababdan ham Superligani kimga qarshi boshlab, kimga qarshi tugatish unchalik muhim emas. Muhimi – biz yana Superligadamiz! Va yana bir bor O‘zbekiston futbol assotsiatsiyasi hamda Professional futbol ligasiga «Bunyodkor»da olib borayotgan ishlarimizni ijobiy baholab, ishonch bildirgani va jamoamizni Superliga jamoalari qatorida ko‘rgani uchun minnatdorchilik bildiraman», – degan Mirzayevning so‘zlarini keltirmoqda klub matbuot xizmati.

Ma'lumot uchun, «qaldirg‘ochlar» qur'aga asosan Superliganing dastlabki beshta turini mos ravishda «So‘g‘diyona», «Paxtakor», «Bunyodkor», «Andijon» va OKMK klublariga qarshi o‘tkazadi.

Eslatib o‘tamiz, qur'a oldidan Kun.uz bilan suhbatda bo‘lgan Ulug‘bek Mirzayev «Bunyodkor»ning bugungi holati, Komilov va Ashurmatovlarning transfer narxlari, Simonenkoga to‘langan 50 ming dollar va klub mavsumni qaysi stadionda boshlashi kabi mavzularda ma'lumot bergandi.