Joriy yilning bahorida yaponiyalik 29 yoshli chap qanot himoyachisi Itsuki Urata Toshkentning «Bunyodkor» klubini tark etgandi. Bunga klubda davom etayotgan moliyaviy muammolar asosiy sabab sifatida keltirilgandi. Shundan soʻng, Urata «Slaven Belupo» jamoasi bilan 1 yillik shartnoma imzoladi va faoliyatini shu yerda davom ettirapti.
Keyinchalik yaponiyalik futbolchi FIFA Nizolarni hal qilish palatasiga ariza bilan murojaat qilgan. Kun.uz oʻrgangan rasmiy hujjatlarga koʻra, 2026-yil 13-avgust kuni mazkur mehnat nizosi boʻyicha yakuniy qaror qabul qilingan.
Hujjatga muvofiq, «Bunyodkor» futbolchiga quyidagi miqdordagi mablagʻlarni toʻlab berishi majburiy etib belgilandi:
toʻlanmay qolgan maosh sifatida 45 ming dollar;
yuqoridagi qarzning har 15 ming dollari uchun 2026-yilning 6-fevral, 6-mart va 27-mart sanalaridan boshlab toʻlov toʻliq amalga oshirilgunga qadar yillik 5 foizlik ustama;
shartnomani buzganlik uchun kompensatsiya sifatida 283 ming 426 dollar jarima. Bunda ham toʻlov toʻliq toʻlangunga qadar 2026-yil 27-martdan boshlab yillik 5 foiz ustama.
Agar barcha belgilangan summalar va ustamalar qaror eʼlon qilingandan keyin 45 kun ichida toʻliq toʻlanmasa, klubga nisbatan jiddiy sanksiyalar qoʻllaniladi. Xususan, «Bunyodkor» toʻlov toʻliq amalga oshirilmagunicha milliy va xalqaro darajada yangi futbolchilarni roʻyxatdan oʻtkazish huquqidan mahrum qilinadi. Ushbu taqiq ketma-ket uchta toʻliq transfer oynasi davomida amal qiladi. Agar uchta transfer davri yakuniga qadar ham toʻlov qilinmasa, ish FIFA Intizom qoʻmitasiga oshiriladi.
