Iroqlik deputat Hasan Salimning aytishicha, IShID yetakchisi Abu Bakr al-Bag‘dodiy Iroqning Anbar viloyatidagi cho‘lda amerikalik harbiylar himoyasi ostida erkin harakatlanmoqda.
Deputatning ta'kidlashicha, al-Bag‘dodiy Iroq va Suriya o‘rtasida harakatlanmoqda. Unga himoya amerikalik harbiylar joylashgan Ayn al-Asad harbiy bazasidan taqdim qilinmoqda.
Deputatning fikricha, amerikalik harbiylar IShID yetakchisini “Iroqdan xorijiy qo‘shinlarni chiqarib yuboruvchi qonun loyihasi ma'qullanishidan qo‘rquv” sabab qo‘llab-quvvatlashmoqda.
Xavfsizlik bo‘yicha kurd eksperti Xavkar al-Jafning Baghdad Today axborot agentligiga ma'lum qilishicha, al-Bag‘dodiy hozirda Suriyada bo‘lmay, Sarsar ko‘li va ona shahri Samarra o‘rtasidagi hududda qolmoqda. U Iroqda bo‘lganda o‘z xavfsizligini ta'minlash maqsadida mahalliy qabilalar bilan aloqalaridan foydalanmoqda.
Iroq parlamentidagi eng yirik blok “Al-Fath” vakili Axmad al-Asadiyning ma'lum qilishicha, AQSh qo‘shinlarining Iroqdan olib chiqilishi haqidagi qonun mart boshiga belgilangan sessiyada birinchilardan bo‘lib ovozga qo‘yiladi.
Parlament spikeri birinchi o‘rinbosari Hasan al-Ka'abiy fevral boshida Iroq parlamenti AQSh bilan xavfsizlik haqidagi kelishuvni bekor qilish haqidagi qonunni ishlab chiqmoqchiligini ma'lum qilgandi. Bu esa amerikalik va boshqa xorijiy harbiylarning Iroqdan olib chiqilishiga olib keladi.