Ilk Prezident maktabi qurilishi boshlandi

Bosh vazirning birinchi o‘rinbosari Ochilboy Ramatov, Qoraqalpog‘iston Respublikasi Jo‘qorg‘i Kengashi raisi ​ Musa Yerniyazov va «Nuroniy» jamg‘armasi Qoraqalpog‘iston Respublikasi Kengashi rahbari Sharap Usnatdinov Prezident maktabining poydevoriga kapsula qo‘yib, maktab qurilish ishlarini boshlab berishdi. Bu haqda Xalq ta'limi vazirligi axborot xizmati ma'lumot tarqatgan.

Ma'lum qilinishicha, birinchi Prezident maktabi Berdaq nomidagi qoraqalpoq davlat universiteti oldidagi hududda barpo etiladi​.

Eslatib o‘tamiz, 2019 yilning 20 fevralida Prezidentimiz Shavkat Mirziyoev «Prezident maktablarini tashkil etish to‘g‘risida»​gi qarorni imzolagan edi. 

Hujjatga ko‘ra, Prezident maktablari mamlakatning barcha hududlarida bosqichma-bosqich tashkil etiladi.

Birinchi uchta maktab joriy yilda Nukus, Toshkent va Xivada ochilishi belgilangan edi. 2019 yilda Prezident maktabini Namangan shahrida ham qurish bo‘yicha qaror qabul qilindi. 

2020-2021 yillar davomida mamlakatimizning boshqa viloyatlarida ham Prezident maktablari tashkil etiladi.

Kembrij Universitetining Cambridge Assessment International Education brendi ostida faoliyat yurituvchi Imtihon Kengashi Prezident maktablariga qabul imtihonlarini tashkil etishi kutilmoqda.​