17:19 / 07.03.2019
49891

Otabek Umarov triatlon federatsiyasiga rahbar bo‘ldi

Otabek Umarov O‘zbekiston triatlon federatsiyasi raisi lavozimiga saylandi.

Bugun, 7 mart kuni Milliy olimpiya qo‘mitasida O‘zbekiston triatlon federatsiyasining navbatdan tashqari hisobot-saylov Konferensiyasi bo‘lib o‘tdi. Unda MOQ prezidenti Umid Ahmadjonov, O‘zbekiston triatlon federatsiyasi rahbariyati va mutasaddilari, hakamlar, sportchilar hamda OAV xodimlari ishtirok etishdi.

Kun tartibidan o‘rin olgan eng asosiy masala federatsiya raisi va unga birinchi o‘rinbosar saylashdan iborat edi.

Kun.uz muxbiri xabar berishicha, O‘zbekiston triatlon federatsiyasi raisi lavozimga Otabek Muhammadaliyevich Umarov nomzodi ilgari surildi. Konferensiya ishtirokchilari bir ovozdan ko‘rsatilgan nomzodni qo‘llab-quvvatlashlarini ma'lum qilishgan. Shu tariqa, Otabek Umarov O‘zbekiston triatlon federatsiyasi raisi lavozimiga saylandi.

Sobiq sportchi, triatlon bo‘yicha ko‘plab xalqaro musobaqalar ishtirokchisi, hozirda tadbirkorlik bilan shug‘ullanayotgan Farrux Nosirov esa federatsiya raisining birinchi o‘rinbosari lavozimiga tasdiqlangan.

«Menga mana shunday imkoniyat berilganidan mamnunman. Yurtimizda triatlon sportini rivojlantirishga, uning ommaviyligini ta'minlashga bor kuch-g‘ayratimni ishga solaman. Yurtimizda iste'dodli sportchilar ko‘p. O‘ylaymanki, ularni saralab olib, jahon arenalarida munosib ishtirok etishlari va sovrindorlar qatoridan joy olishlarida tajribam asqotadi. Biz kelajakda Tokio Olimpiadasiga yo‘llanma olibgina qolmasdan, sovrindorlar qatoridan joy oladigan atletlar tarbiyalashga va'da beramiz», – degan Farrux Nosirov. 

Yig‘ilish davomida MOQ rahbari Umid Ahmadjonov ham triatlon sportining faoliyatiga to‘xtalib o‘tgan.  

«Tan olish kerak, oxirgi paytlar triatlon bo‘yicha maqtangudek natijalar yo‘q. Shu bois Olimpiya o‘yinlari dasturiga kiritilgan ushbu sport turini yanada rivojlantirib, sportchilarning shug‘ullanishlari uchun zamonaviy moddiy-texnik bazani yaratib beramiz. O‘ylaymanki, ushbu sport turi bo‘yicha kelajakda jahon arenalarida munosib ishtirok etadigan atletlar yetishib chiqadi», – degan Umid Ahmadjonov. 

Top