Bugun, 9 mart kuni O‘zbekiston Superligasida 1-turning ikki o‘yini o‘tkaziladi. Kunning markaziy o‘yini Samarqandda kechadi. Yuqori divizionga qaytgan «Dinamo» qo‘shni Qashqadaryo viloyatining «Nasaf» jamoasini qabul qiladi. «Buxoro» esa O‘zbekiston Kubogi sohibi OKMK mehmoni bo‘ladi.
«Dinamo» - «Nasaf»
Boshlanish vaqti: 16:00.
Samarqandning «Dinamo» klubi yangi mavsumni Pro-Ligada boshlashga tayyorlanayotgandi. Lekin klub o‘zi uchun ham kutilmaganda mavsumni Superligada boshlashi aniq bo‘ldi. «Dinamo» 2017 yil qanday tushunarsiz tarzda yuqori diviziondan tushirib yuborilgan bo‘lsa, 2019 yil xuddi shunday tushunarsiz tarzda yuqori divizionga qaytarildi. Samarqandliklar Superligada debyut qilishadi, desak to‘g‘ri bo‘ladi. Chunki jamoa Ilhom Sharipov murabbiyligida quyi ligaga tushib ketganida chempionatimiz bunday jarangli nom bilan atalmas edi. U vaqtlar yuqori divizionimiz shunchaki Oliy Liga deyilardi.
«Dinamo» safida o‘zgarishlar ko‘p bo‘lmadi. Mavsum oralig‘ida jamoaning asosiy transferi hujumchi Vohid Shodiyev bo‘ldi. O‘z vaqtida terma jamoa safida o‘ynagan tajribali futbolchi o‘tgan mavsumni Pro-Liga vakili «Mash'al»da o‘tkazgandi. «Dinamo» Superligaga chiqishi aniq bo‘lgach yana ikki futbolchi jamoani to‘ldirdi. 23 yoshli terma jamoamiz bilan Osiyo chempioni bo‘lgan darvozabon Botirali Ergashev endilikda Samarqand klubida o‘ynaydi. Jamoa safida Shohrux Eshbo‘tayev kabi yaxshi darvozabonning borligini inobatga olsak, bu borada yaxshigina raqobat paydo bo‘lgan.
Bundan tashqari, «Dinamo» jamoa yetakchisi Jasur Azimovni ham ortga qaytarishga erishdi. Maydon markazida ishonchli o‘yin ko‘rsatib samarqandliklar mehrini qozongan Jasur «Navbahor»ga ketgandi, lekin «Dinamo» o‘z tarbiyalanuvchisi bo‘lgan futbolchini ortga qaytardi.
«Nasaf» har mavsum oldidan yetakchilarini yo‘qotishiga odatlanib qoldik. O‘tgan mavsum tugagach Sanjar Quvvatov va Odil Hamrobekov «Ajdarlar» uchun tanish yo‘nalish bo‘yicha «Paxtakor»ga yo‘l olishgandi. Bundan tashqari, Saydullo Rahmatov va Maqsud Karimov ham jamoani tark etishdi. «Nasaf» o‘z tarkibini ikki yaxshi futbolchi bilan boyitganini ham ta'kidlash kerak. O‘tgan mavsumni «Mash'al»da o‘tkazgan Humoyun Murtazoyev hamda Sardor Abduraimov endilikda «Nasaf»da o‘ynashadi.
«Nasaf» yana ikki muhim vakili bilan ham shartnomani uzaytirgan. Avvalo Ro‘ziqul Berdiyev bilan kelishuv uzaytirilgani qarshiliklar uchun yaxshi yangilik bo‘ldi. Shuningdek, bir qancha klublar taklif bilan chiqqan markaziy himoyachi Umar Eshmurodov ham «Nasaf»da qoldi. Ro‘ziqul Berdiyev Qarshida yana yangi futbolchilarni kashf etgan va jamoa ular bilan yangi mavsumda sovrinli o‘rinlar uchun kurashishini kutsak bo‘ladi.
