Kruiz vaqtida nogironga aylangan yo‘lovchi 10 mln dollar tovon puli talab qildi

Mariner of the Seas kruiz layneri yo‘lovchisi attraksiondan yiqilib nogironga aylanganidan so‘ng Royal Caribbean kompaniyasini sudga berdi. Bu haqda Fox News xabar qildi.

Ma'lum qilinishicha, amerikalik 25 yoshli Keysi Xolladey fevral oxirida kruiz laynerida Bagam orollariga sayohatga chiqqan. Sayohat vaqtida u kema yuqori palubasida joylashgan Sky Pad attraksionida uchmoqchi bo‘ladi. Attraksion tutqichga mustahkamlangan shar shaklida bo‘lib, yo‘lovchilar shar ichiga rezina arqonlar bilan bog‘lanadi va batutda sakrashadi.  

Xolladeyning aytishicha, shar yuqoriga ko‘tarilishi bilan tutqich sinib ketgan va u olti metr balandlikdan qulagan.

Kema voqea sodir bo‘lishi bilan jabrlanuvchini kasalxonaga yotqizish uchun Mayami portiga qaytgan. Xolladey to‘qqiz kun kasalxonada yotgan va bir nechta operatsiyani boshidan o‘tkazgan. Endilikda u faqat hassalar yoki nogironlar aravachasida harakatlanishi mumkin.

U Royal Caribbean kompaniyasidan 10 million dollar tovon puli to‘lashni talab qilmoqda. Uning advokatining aytishicha, Sky Pad kabi ko‘ngilochar attraksionlar faqat quruqlikda joylashishi va mutaxassislar nazoratida bo‘lishi shart.