Xorazmda quyosh panellari ishlab chiqaruvchi qo‘shma korxona tashkil etiladi

O‘zbekiston davlat aktivlarini boshqarish agentligi va Turkiyaning Endüstriyel Elektrik Elektronik San. ve Tic. Ltd. Şti. kompaniyasi o‘rtasida Vip Solar Endustriyel Uz qo‘shma korxonasini tashkil etish bo‘yicha kelishuv imzolandi. Bu haqda O‘zbekiston prezidentining normativ-huquqiy hujjatlar loyihalari muhokamasi portalida joylashtirilgan qarori loyihasida aytilmoqda.

Hujjatda qayd etilishicha, mazkur qo‘shma korxonada 200 MVt quvvatga ega zamonaviy quyosh panellari ishlab chiqariladi.

Qo‘shma korxonaning ustav kapitali 30 million dollarni tashkil qiladi.

Bundan tashqari, 2021—2023 yillar mobaynida korxona yordamchi asbob-uskuna, jumladan, invertor, kollektor va boshqa turdagi energiya tejovchi asbob-uskuna va texnologiyalar ishlab chiqaradi.

Korxona qurilishi uchun Urganch tumanidan 6 gektar yer maydoni ajratiladi.

Qaror loyihasida aytilishicha, qo‘shma korxona 2022 yilning 1 yanvarigacha bir qator bojxona to‘lovlaridan ozod qilinadi.