O‘zbekistonda «turistik mahallalar» quriladi

Normativ-huquqiy hujjatlar loyihalari muhokamasi portalida Vazirlar Mahkamasining “Qishloq joylarda agroturizm sohasini jadal rivojlantirish yuzasidan qo‘shimcha chora-tadbirlar to‘g‘risida”gi qarori loyihasi joylashtirildi. 

Hujjatga ko‘ra, Surxondaryo viloyati hokimligi, O‘zbekiston Respublikasi Qishloq xo‘jaligi vazirligi, Madaniyat vazirligi, Turizmni rivojlantirish davlat qo‘mitasining tajriba tariqasida fermer xo‘jaliklari va boshqa qishloq xo‘jaligi korxonalarining faoliyatini kengaytirish va diversifikatsiya qilish, qishloq xo‘jaligi mahsulotlari, shu jumladan, sharob mahsulotlari, quritilgan mevalar, shirinliklar va boshqalarni joyida tatib ko‘rishni tashkil qilish yo‘li bilan ular hududida yagona tuzilmaga biriktirilgan agro-etno-qishloq shaklidagi model uyushma barpo etish to‘g‘risidagi taklifi ma'qullanishi mumkin.

Surxondaryo viloyati hokimligi tadbirkorlik sub'yektlarini jalb qilgan holda qishloq turistik klasteri faoliyati samarali yo‘lga qo‘yilishini ta'minlaydi.

Bunda baxshichilik san'ati, kashtado‘zlik, an'anaviy mahalliy raqs va milliy cholg‘u asboblari ko‘rgazmasi, milliy musobaqa va o‘yinlarni o‘tkazilishiga alohida e'tibor qaratiladi.

O‘zbekiston Respublikasi Turizmni rivojlantirish davlat qo‘mitasi Qishloq xo‘jaligi vazirligi, Madaniyat vazirligi bilan birgalikda 2019 yil yakuniga qadar dastlabki loyiha natijalarini tahlil qiladi va natijalari bo‘yicha ijobiy tajribani boshqa hududlarda tatbiq etish yuzasidan takliflarni O‘zbekiston Respublikasi Vazirlar Mahkamasiga kiritadi.

O‘zbekiston Respublikasi Qurilish vazirligi:

Turizmni rivojlantirish davlat qo‘mitasi, Qoraqalpog‘iston Respublikasi Vazirlar Kengashi va viloyat hokimliklari bilan birgalikda yetakchi loyiha institutlarini jalb etgan xolda qishloq va etnografik turlar (an'anaviy turmush tarzi, hunarmandchilik, taom tayyorlash va boshqalar) doirasida sayyohlarni qabul qilish istagiga va imkoniyatiga ega bo‘lgan dehqon va fermerlar uchun “turistik mahalla” tipidagi uy-joy komplekslari (an'anaviy uslubdagi) namunaviy loyihasini milliy va zamonaviy arxitekturaning uyg‘unlashgan uslubida ishlab chiqadi.

Belgilanishicha, “turistik mahalla” tipidagi uy-joy komplekslari namunaviy loyihasini ishlab chiqish xarajatlari O‘zbekiston Respublikasi Turizmni rivojlantirish davlat qo‘mitasi huzuridagi budjetdan tashqari Turizm sohasini qo‘llab-quvvatlash jamg‘armasi mablag‘lari hisobidan moliyalashtiriladi;

Qoraqalpog‘iston Respublikasi Vazirlar Kengashi va viloyatlar hokimliklari bilan birgalikda 2020-2025 yillar uchun har yili 1 fevralga qadar tasdiqlanadigan agroturizmni tashkil etish va rivojlantirish bo‘yicha hududiy dasturlar doirasida turistik salohiyatga ega bo‘lgan tumanlarda kamida ikkitadan “turistik mahalla” tipidagi uy-joy komplekslari qurilishini ta'minlaydi.

Bunda qurilish uchun tanlab olingan hududda tabiiy ravishda o‘sadigan o‘simliklardan foydalangan xolda komplekslar yon-atrofini zamonaviy landshaft dizayni uslubida obodonlashtirishga alohida e'tibor qaratiladi.