«Badavlat kishilar ayrim ishlardan tiyilishlari kerak». «Krasnodar» xo‘jayini Mamayev bilan bog‘liq vaziyatga munosabat bildirdi

«Krasnodar» xo‘jayini Sergey Galitskiy jamoaning ayni vaqtda bezoriligi uchun qamoqda bo‘lgan yarimhimoyachisi Pavel Mamayev bilan shartnoma bekor qilinishiga izoh berib o‘tdi.

«Mamayev bilan shartnomani bekor qilish uchun o‘z sabablarimiz bor. Biz bu bahsli ish bo‘yicha palataga murojaat etdik. Bu mening shaxsiy qarorim. Aytishim bo‘lgan gap shu. Men o‘z so‘zlarim bilan Pavelning taqdiriga ta'sir ko‘rsatishni istamayman. Eshitishimcha, Rossiya qamoqxonasi yoqimli joy emas. Inson sifatida o‘z so‘zlarim bilan sud qaroriga ta'sir ko‘rsatmoqchimasman. Bizning ishimiz — sud qaroriga qadar jim turish. U bilan munosabatlarimiz – alohida shaxsiy ish. U nimadir qilganki, taqdir uni o‘sha joyga olib bordi. Menimcha, bu Pavel uchun og‘ir saboq.

Rossiyada 11 ming bola futbol bilan shug‘ullanadi, ularning ko‘z o‘ngidagi futbolchilar bilishlari kerakki, ularga oddiy odamlarga qo‘yiladigan talablar qo‘yilmaydi. Buning evaziga ular katta maosh olishadi. Stadionda ularning nomini aytib hayqirishsa, bu ular istaydimi, yo‘qmi, bu ularga majburiyatlar yuklaydi. Badavlat kishilar boshqalarga ruxsat berilgan ayrim narsalardan tiyilishi kerak. Agar bunday cheklovlarga amal qilishni istamasangiz, marhamat, boshqacha hayot kechiring. 

11 ming bola uxlashga yotayotganida futbolchiga kumiridek qaraydi. Futbolchining harakatlaring esa bunga mos bo‘lishi kerak. Ayniqsa, bu katta klublardagi futbolchilarga tegishli. Futbolchi odamning boshiga stul bilan urish to‘g‘ri emasligini, to‘rt kishi bo‘lib yerda yotgan kishini kaltaklamaslik kerakligini bilishi kerak. Jamiyat bunga to‘g‘ri reaksiya berishi kerak. Men Pavelga yomonlik istamayman, uning muammolari tezroq yakunlanishini istayman, bolalar esa bilishlari kerakki, biz bunday voqealarga jim qarab turmaymiz», — degan Galitskiy «Russkiye norm!» YouTube-kanali uchun bergan intervyusida.

Eslatib o‘tamiz, 2018 yil oktabr oyida «Zenit» hujumchisi Aleksandr Kokorin, uning ukasi Kirill Kokorin, «Krasnodar» yarimhimoyachisi Pavel Mamayev va uning do‘sti Aleksandr Protasovitskiy Moskva shahridagi bir necha mushtlashuvlarda ishtirok etishgani uchun 8 dekabrga qadar hibsga olingan edi. Keyinchalik, tergov ishlari yakunlanmagani uchun hibs muddati 3 marta - 8 fevralga, 8 aprelga va 25 sentyabrga qadar uzaytirildi. 

Shu tariqa, futbolchilar yana 6 oy davomida qamoqda qolishadi.