Kun.uz tahririyatiga Toshkent shahridan Umra va Haj safarlariga ziyoratga borayotgan keksa otaxon va onaxonlarning tibbiy tekshiruvdan o‘tishi va emlanishi bilan bog‘liq murakkab vaziyatlar yuzaga kelayotgani xususida murojaatlar kelib tushdi.
Biz vaziyat bilan yaqindan tanishish uchun Toshkent shahri Mirzo Ulug‘bek tumanidagi 5-son oilaviy poliklinikada bo‘ldik.
Bu yerda Toshkent shahridan Haj va Umraga boruvchi barcha (!) ziyoratchilar yakuniy tibbiy ko‘rikdan o‘tkazilib, emlanar ekan.
Buning uchun qariyalar avvalo 5-poliklinikaning yerto‘lasiga tushishar ekan. Yerto‘lada ularning o‘zi propiska qilingan tumanlardagi tibbiyot birlashmalari orqali to‘plagan hujjatlarini ko‘zdan kechirilar ekan. Qayd etib o‘tish lozim, anchadan buyon ta'mirlanmagan poliklinikaning yerto‘lasida keksalar diqqinafas bo‘lib o‘tirishibdi. Chunki ularga kutish uchun ajratilgan joy shamollatilmaydi. O‘rindiq esa hammaga ham yetmaydi.
Keyin poliklinikaning birinchi qavatida ziyoratchilar vrachlar yakuniy ko‘rigidan o‘tkazilib, emlanar ekan.
Haj safariga boruvchilar uchun har kuni 50 kishidan iborat navbat hosil qilingan. Biz borgan kuni (4 aprel) 6 aprel uchun navbat shakllantirilib, jurnalda ro‘yxat tuzilayotgan ekan.
Umra safariga borayotganlar uchun ro‘yxat shakllantirilmasdan, jonli navbat orqali fuqarolar qabul qilinar ekan.
Biz fuqarolarni gapga tutdik. Ular bu maskanga 2-3 martalab qatnashga majbur bo‘lishayotgani, navbatda turish, kutish bilan bog‘liq ma'lum bir qiyinchiliklar yuzaga kelayotganini aytib o‘tishdi. Agar hujjatlarda kamchilik topilsa, uni tuzatib kelish uchun yana vaqt sarflanadi. Ziyoratchilarning aksariyati qariyalar ekanini yodda tuting.
