Polsha Germaniyadan 900 milliard dollar talab qilmoqda 

Polsha Ikkinchi jahon urushi vaqtida Varshavaga yetkazilgan ziyonni qoplash sifatida Germaniyadan 900 mlrd dollar talab qilmoqda. Bu haqda Polsha seymi deputati Yanush Shevchak Wpolityce nashriga bergan intervyusida aytib o‘tdi. 

Deputat urush uchun kompensatsiya to‘lanishi mavzusining Polsha tomonidan 30 yil e'tiborsiz qoldirilganini sharmandalik deb atagan. Uning aytishicha, ushbu qonun loyihasini Berlinga berish uchun faqat “Qonun va adolat” partiyasi amaliy choralar ko‘rgan.

Shevchakning ta'kidlashicha, kompensatsiya talabi agar fashistlar Polshani talon-taroj qilmaganda va u yerda og‘ir jinoyatlar sodir etmaganda hozirda Polsha yanada gullayotgan davlat bo‘lishi mumkinligi bilan bog‘langan.

“Germaniya reparatsiyani to‘lash uchun munosib moliyaviy mablag‘larni tayyorlab qo‘yishi lozim”, deb aytgan deputat.

Reparatsiya mavzusi Polshada 2017 yildan boshlab muhokama qilina boshlangan. Polsha hukumati mamlakat “Berlinning okkupatsiya siyosati sababli Yevropaning barcha davlatlaridan ko‘proq ziyon ko‘rgan” deb hisoblaydi.

Germaniyada esa biror-bir to‘lovga asos ko‘rmayotganlari, chunki Polsha 1953 yilda reparatsiyadan rasman voz kechgani aytib kelinadi.