Chorak finalning «Old Trafford»da kechgan birinchi o‘yinida kataloniyaliklarning minimal ustunligi qayd etildi (1:0).
Chempionlar ligasi. 1/4 final. Birinchi o‘yin
«Manchester Yunayted» (Angliya) – «Barselona» (Ispaniya) – 0:1 (0:1)
Gol: Shou, 12 – avtogol.
«Manchester Yunayted»: de Xea, Yang, Smolling, Lindelef, Shou, Maktominey, Fred, Pogba, Dalot (Lingard, 74), Reshford (Pereyra, 85), Lukaku (Marsiyal, 68).
«Barselona»: ter Shtegen, Semedu, Pike, Langle, Jordi Alba, Artur (Serji Roberto, 66), Buskets (Alenya, 90+3), Rakitich, Messi, Suares, Koutinyu (Vidal, 65).
Ogohlantirishlar: Buskets, 18. Shou, 19. Vidal, 71. Lingard, 76. Smolling, 86.
Hakam: Rokki (Italiya).
10 aprel. Manchester. «Old Trafford» stadioni.
Javob o‘yini - 16 aprel.
Maradonadan Messigacha
«Barselona» va «Manchester Yunayted»ning xalqaro maydonlardagi uchrashuvlari afsonaviy argentinalik futbolchi Diyego Maradona futbol o‘ynagan davrlarda boshlangan - 1983-84 yilgi mavsumda bu ikki jamoa Kubok egalari kubogi turnirida bahs olib borishgan. Bu qarama-qarshilik boshqa bir argentinalik futbol dahosi Lionel Messi ishtirokida davom etib kelmoqda. O‘tgan asrda Maradona boshchiligidagi jamoa Kubok egalari kubogining chorakfinalida «MYu»ga ikki uchrashuv natijasiga ko‘ra 2:3 hisobida mag‘lub bo‘lgan, Messi boshchiligidagi ko‘k-anorranglilar esa uch yilda ikki marta manchesterliklarni Chempionlar ligasi finalida mag‘lub etgan. 2009 yilda Rimdagi finalda Gvardiola jamoasi o‘zining ilk katta sovrinini yutib olgandi, 2011 yilda «Uembli»dagi finalga kelib bu jamoa mukammallashib bo‘lgani jahonga ko‘z-ko‘z qilingandi.
Londondagi o‘sha oqshomdan keyin bu jamoalarning yo‘llari kesishmadi - Manchesterdagi birinchi o‘yin 8 yildan keyingi dastlabkisi edi. Ko‘k-anorranglilar yana bir marta «Orzular teatri»ni zabt etish orzusiga erishish uchun maydonga chiqishdi: «Barsa» shu vaqtgacha «MYu» stadionidan g‘alaba bilan qaytmagandi (+0=2-2, to‘plar nisbati 5-9).
«Barselona»ning faolligi
Sulsher bu o‘yinga ideal tarkibni tushira olmasdi - Valensiya, Darmian, Bayi, Errera va Mata jarohatlar tufayli jamoaga yordam bera olmasdi.
