FQB Gitlerning qochishi haqidagi hujjatlarni e'lon qildi

AQSh Federal qidiruv byurosi 1945 yilda Adolf Gitlerning Argentinaga qochib ketganligi to‘g‘risidagi taxminni ko‘rib chiqqan. Bu haqda FQB saytida e'lon qilingan hujjatda aytiladi.

204 betdan iborat hujjatda qayd etilishicha, nemis natsional-sotsialistlari yetakchisi suvosti kemasida Argentinaga yetib borgan va And tog‘ tizmasining janubiy qismidan boshpana topgan. Maxfiy manbaning ma'lumotiga ko‘ra, bunda unga Lotin Amerikasi mamlakatining yuqori lavozimdagi amaldorlari yordam berishgan.  

Hujjatda Gitler bilan birgalikda yana 50 nafar natsistning nomi keltirilgan. Barcha voqealar Berlin qulashidan (1945 yil may) ikki hafta o‘tganidan so‘ng sodir bo‘lgan. Bu hisobot 1945 yil 21 sentyabrda taqdim etilgan.

Ma'lumotlar FQBning birinchi direktori Edgar Guverga berilgan. AQSh harbiy razvedkasi ham mazkur ma'lumotlarga ega bo‘lgan. Ular mazkur surishtiruvni to‘liq emas deb hisoblashgan va Gitlerni qidirmaslikka qaror qilishgan.

Rasmiy talqinga ko‘ra, Adolf Gitler va uning xotini Yeva Braun 1945 yil 30 aprelda Berlinda o‘z jonlariga qasd qilishgan. Ularning jasadlari reyxskanselyariya bog‘ida kuydirib tashlangan.