«Barselona» Primeraning 35-turida «Levante»ni 1:0 hisobida mag‘lub etdi. O‘yindagi yagona g‘alaba to‘pini ikkinchi bo‘limda zaxiradan maydonga tushgan Lionel Messi 62-daqiqada urdi.
Squawka ma'lumotiga ko‘ra, katalonlar klubining bu sovrini Messiga unikal natija qayd etish imkonini berdi. «Barselona» tarixida hech bir futbolchi 10 marta Ispaniya chempioni bo‘lishga erishmagan.
Ispaniya chempionligini undan ko‘proq marta qo‘lga kiritgan futbolchi esa «Real»ning sobiq havbeki Fransisko Xento – 12.
Bu katalonlar klubi so‘nggi 11 mavsumda sakkizinchi bor chempion bo‘lishidir.
Bu vaqt ichida «Barselona»dan tashqari faqat «Real» (ikki marta, 2011/12 va 2016/17 yilgi mavsumlarda) hamda «Atletiko» (2013/14 yilgi mavsum) Ispaniya chempionligiga erishgan
Messi «Barselona» safida 2003 yildan buyon (futbolchilik faoliyatini boshlaganidan buyon) to‘p surib kelmoqda. Ushbu argentinalik futbolchi ayni vaqtga qadar ko‘k-anorranglilar klubi bilan jami 34 sovrin qo‘lga kiritgan, ular orasida 6 marta Ispaniya Kubogi, 8 marta Ispaniya Superkubogi, 4 marta Chempionlar ligasi kubogi, 3 marta UYeFA Superkubogi, shuningdek, uch bor klublar o‘rtasidagi jahon chempionati g‘olibligi bor.
