30 aprel kuni Venesuela muxolifati rahbari Xuan Guaydo Karakasdagi harbiy-havo kuchlariga tegishli bazada olingan videoni e'lon qildi. Videoda u o‘zini qurshab turgan harbiylar orasida turib, mamlakatdagi barcha harbiylarni o‘ziga qo‘shilishga va Nikolas Maduroning uzurpatsiyasiga chek qo‘yishga chorladi va ozodlik harakatining yakuniy bosqichi boshlanayotganini e'lon qildi.
Venesuela prezidenti Nikolas Maduro mamlakatda namoyishlarning yangi to‘lqini boshlanganiga qaramasdan, qaysarlik bilan xavfni inkor qilmoqda.
Miraflores / EPA / Scanpix / LETA
U o‘z telemurojaatida «o‘ng kuchlar, Kolumbiya oligarxiyasi va Amerika imperiyasi» tomonidan sahnalashtirilgan namoyishlar barbod bo‘lgani haqida gapirdi. Maduro muxolifatchilarning namoyishlarini davlat to‘ntarishiga urinish sifatida baholadi va Venesuela prokuraturasi tekshiruv ishlari boshlaganini ma'lum qildi. Venesuela prezidenti «oliy harbiy qo‘mondonlikning tinchlikni himoya qilishdagi jasurligi»ni e'tirof etib, harbiy rahbariyatga minnatdorchilik bildirdi.
Bu vaqtda esa muxolifat rahbari Xuan Guaydo namoyishlar davom etayotgani, ammo uning raqibi xorijiy elchixonaga yashiringani haqida gapirdi.
Manaure Quintero / Reuters / Scanpix / LETA
Guaydoning aytishicha, uning tarafdorlari «armiya ko‘magidan mahrum bo‘lgan» Maduro ustidan g‘alaba qozonilmagunicha ko‘chalarda qarshilik ko‘rsatishda davom etadi. O‘z navbatida namoyishlar arafasida Guaydo tomoniga o‘tgan harbiylar tomonidan uy qamog‘idan ozod qilingan boshqa bir muxolifat yetakchisi Leopoldo Lopes Ispaniya elchixonasidan qo‘nim topgan (Lopes va uning rafiqasi kelib chiqishiga ko‘ra ispanlar). Bundan tashqari, venesuelalik 25 nafar harbiy Braziliya elchixonasidan boshpana so‘ragan. Bu mamlakat prezidenti Jair Bolsonaru Maduro rejimiga qarshi hisoblanadi.
AQSh Davlat kotibi ma'lum qildiki, namoyishlar boshlangach, Maduro Venesueladan Kubaga qochib ketmoqchi bo‘lgan, ammo ruslar uni bundan qaytarishgan. Rossiya va Maduro buni inkor qilmoqda.
