Andijon “Vatanparvar” tashkilotida yoshlar uchun ko‘rgazmali tadbirlar o‘tkazilmoqda

“Vatanparvar” tashkiloti Andijon viloyat Kengashi tomonidan O‘zbekiston Respublikasi Prezidentining 2018 yil 12 dekabrdagi “Yoshlarni vatanparvarlik ruhida va jismoniy tarbiyalash hamda chaqiriluvchilarni harbiy-texnik mutaxassisliklar bo‘yicha tayyorlash tartibini takomillashtirish bo‘yicha qo‘shimcha chora-tadbirlar to‘g‘risida”gi 4061-sonli Qaroriga asosan yoshlarni harbiy-vatanparvarlik ruhida tarbiyalash sohasidagi faoliyatni takomillashtirish, bugungi kunning dolzarb loyihasi bo‘lgan 5 ta tashabbus asosida yoshlarning bo‘sh vaqtini mazmunli o‘tkazish bo‘yicha muayyan ishlar amalga oshirib kelinmoqda. 

Ana shunday mavzudagi ko‘rgazmali ma'naviy tadbirlar Xonobod tumani o‘quv sport texnika klubida muntazam o‘tkazib boriladi. Kuni kecha tashkil etilgan tadbirda ham tumandagi umumiy o‘rta ta'lim maktablari o‘quvchilari, harbiy qism askarlari qatnashdilar. 

O‘quv sport texnika klubining yetakchi o‘qituvchilari sportning texnik va amaliy turlarini targ‘ib qilish maqsadida o‘quvchilarga sport to‘garagi va seksiyalari a'zolari o‘rtasida “O‘q otish”, “Karting” va “Motosport” sport texnikalari ko‘rgazmali taqdimot va amaliy mashg‘ulotlar namoyish qilishdi. 

“Vatanparvar” tashkiloti Andijon viloyat kengashi tasarrufidagi o‘quv muassasalari qoshida sportning karting, avtokross, avtoralli, avtomobil xalqa poygalari, avtomobil ko‘pkurashi, motokross, triatlon, duatlon, yozgi biatlon, o‘q otish, aviomodel, raketamodel, kemamodel sporti, qisqa va ultra qisqa telefon hamda telegraf orqali radioaloqa kabi texnik va amaliy sport turlari ommalashtirilmoqda.