Guaydo AQShning Venesuelada harbiy operatsiya o‘tkazishiga rozi bo‘lishi mumkinligini bildirdi

Venesuela parlamenti spikeri Xuan Guaydo AQSh tomonidan harbiy aralashuv bo‘lishiga rozilik berishi mumkinligini bildirdi.

"Agarda aralashuv inqirozni hal qiladigan bo‘lsa, balki unga rozi bo‘lishim mumkin", – dedi u Italiyaning La Stampa gazetasiga bergan intervyusida.

"Bu imkoniyatlardan biri. Biz saylovlar yo‘lini tanladik, ammo xalq aziyat chekmoqda va biz bunga mos ravishda barcha variantlarni ko‘rib chiqishimiz lozim", - dedi Guaydo.

Venesuelada 21 yanvar kuni prezident Maduroga qarshi ommaviy namoyishlar boshlandi. AQSh boshchiligidagi qator G‘arb davlatlari Guaydoni vaqtinchalik prezident deb tan oldi.  Rossiya, Xitoy, Turkiya va boshqa davlatlar Maduroni qo‘llab-quvvatladi.

30 aprel kuni muxolifat davlat to‘ntarishini amalga oshirishga urindi. Ammo bu urinish muvaffaqiyatsiz bo‘ldi.