8535.74 USD +17.06

9566 EUR -86.52

132.57 RUB +1.24

10746.5 GBP -101.19

08:10 / 07.06.2019 10217

Миллатлар лигаси. Нидерландия Англияни қўшимча бўлимларда мағлуб этиб, финалга чиқди

Фото: REUTERS

Нидерландия миллий жамоаси Миллатлар лигаси ярим финалида Англияни мағлуб этиб, турнир финалига йўл олди.

Португалиянинг Гимарайнш шаҳрида кечган баҳснинг асосий вақтида жамоалар ҳар икки бўлим ўрталарида биттадан тўп киритишди. 32-дақиқада ҳимоячиларнинг хатосидан кейин белгиланган пенальтини Маркус Рэшфорд аниқ амалга ошириб ҳисобни очди, 73-дақиқада эса бурчак тўпидан кейин боши билан дарвозани ишғол этган Маттейс де Лигт мувозанатни тиклади. Натижада ўйин овертаймларда давом эттирилди.

Қайд этиш керак, мазкур баҳс ҳам VAR билан боғлиқ голли эпизодсиз ўтмади. 83-дақиқада Лингард Барклининг пасидан кейин дарвозабон билан яккама-якка вазиятга чиқиб, гол урди; аммо VAR`га мурожаат қилган ҳакам Жесси ўйиндан ташқари ҳолатда қолган деб топиб, голни бекор қилди.

Қўшимча бўлимларнинг 7-дақиқасида Кайл Уокернинг автоголи билан «учар ҳолландлар» ҳисобда олдинга чиқиб олишди. 114-дақиқага келиб, Англиянинг ҳимоядаги навбатдаги хатоси ортидан якун ҳисоб ўрнатилди – гол муаллифи бўлган Промесга биринчи бўлимда де Лигтнинг голига ассистентлик қилган Депай сўнгги пасни аниқ узатди.

Миллатлар лигасининг илк ғолиб ва совриндорлари шу ҳафта охирида аниқланади. Якшанба куни нидерландлар мезбон Португалияга қарши финалда, инглизлар эса Швейцария билан учинчи ўрин учун баҳсда майдонга тушади.

Миллатлар лигаси
1/2 финал, 6 июнь
Нидерландия – Англия 3:1 (0:1, 1:0, 1:0)
Голлар: 0:1 – 32, пенальти Рэшфорд, 1:1 – 73 де Лигт, 2:1 – 97, автогол Уокер, 3:1 – 114 Промес.
Нидерландия – Силлессен, де Лигт, Блинд, Думфрис, ван Дейк, Депай, де Рон (ван де Бек, 68), Бергвейн (Проппер, 90), Вейналдум, Бабел (Промес, 68), де Йонг(Стротман, 114).
Англия – Пикфорд, Райс (Алли, 105), Магуайр, Стоунз, Делф (Хендерсон, 77), Стерлинг, Баркли, Уокер, Санчо (Лингард, 61), Чилуэлл, Рэшфорд (Кейн, 46).
Огоҳлантиришлар: де Лигт (30), Думфрис (44), Кейн (70), ван де Бек (106).

 

Top