Хитой ва АҚШ ўртасидаги товар алмашиш ҳажми 2019 йилнинг беш ойи давомида ўтган йилнинг шу даврига нисбатан 14,58 фоизга қисқарди. Бу ҳақда ХХР божхона бошқармаси маълум қилди.

Айтилишича, январь-май ойларида икки давлат ўртасидаги товар алмашиш ҳажми 209,68 млрд долларни ташкил этган. 2018 йилнинг худди шу даврида эса бу кўрсаткич 245 млрд доллардан ортиқроқ бўлган.

Аввалроқ Хитой ва АҚШ бир неча ой давомида савдо баҳсларини тартибга солиш бўйича музокаралар олиб борганди. Бу музокараларнинг охирги 10-раунди 9-10 май кунлари Вашингтонда бўлиб ўтган, бироқ шундан кейин улар боши берк кўчага кириб қолди. АҚШ 200 миллиард долларлик Хитой маҳсулотларига бож тўловини 10%дан 25%гача оширди.