AQSh Britaniyaga Assanjning ekstraditsiyasi bo‘yicha rasmiy so‘rov yubordi – OAV

AQSh adliya vazirligi Buyuk Britaniya hukumatiga Wikileaks asoschisi Julian Assanjning AQShga ekstraditsiya qilinishi bo‘yicha rasmiy so‘rov yubordi. Bu haqda Washington Post nashri o‘z manbalariga iqtibos keltirgan holda xabar berdi.

Amerikalik yuqori lavozimli mansabdor shaxs noma'lum bo‘lib qolish sharti bilan so‘rov 6 iyunda yuborilganini ma'lum qilgan. Ikki davlat o‘rtasidagi kelishuvga ko‘ra, bu so‘rov Assanj hibsga olingandan keyin 60 kun ichida, ya'ni 10 iyungacha yo‘llanishi kerak edi.

Nashrning ta'kidlashicha, kelishuvga ko‘ra ekstraditsiya bo‘yicha so‘rov yuborilgandan keyin AQSh Assanjga yangi ayblovlar bildira olmaydi. Avvalroq Wikileaks AQSh adliya vazirligi Assanjga qarshi yangi ayblovlar tayyorlaganini ma'lum qilgan. 

Assanj 11 aprelda 2012 yilda sudga kelmagani uchun berilgan order va Shvetsiya hamda AQSh hukumati talablariga ko‘ra Ekvador elchixonasida hibsga olingandi. 1 may kuni u garov puli evaziga ozodlikka chiqish shartini buzganligi uchun 11,5 oylik qamoq jazosiga mahkum qilingandi.

AQSh hukumati Assanjga josuslik va maxfiy ma'lumotni oshkor qilish ayblovlarini bildirgan. Unga 175 yillik qamoq jazosi xavf solmoqda. Britaniya sudi jurnalistning AQShga ekstraditsiya qilinishi bo‘yicha qaror qabul qilishi kerak bo‘ladi. Ushbu ish bo‘yicha sud jarayoni 12 iyundan davom ettiriladi.