Ruhoniy: Eronning yadroviy kelishuv bo‘yicha majburiyatlarni bajarishni to‘xtatib qo‘yishiga yevropaliklar javobgar 

Eron prezidenti Hasan Ruhoniy mamlakatning yadroviy dastur bo‘yicha kelishuvdagi o‘z majburiyatlarini bajarishni to‘xtatib qo‘yishiga yevropalik hamkorlar javobgar ekanligini bildirdi. Al Mayadeen telekanalining ma'lum qilishicha, Ruhoniy Fransiya prezidenti Emmanyuel Makron bilan telefon orqali muloqotda bu haqda ma'lum qilgan.

"Eronning oxirgi qadamlari yadroviy kelishuv doirasidan chiqmaydi va kelishuvni buzish hisoblanmaydi", - degan u. 

Shu bilan birga Ruhoniy Eronga qarshi barcha sanksiyalarning bekor qilinishigina Tehronni o‘z qarorlarini qayta ko‘rib chiqishga majbur qilishi mumkinligini aytgan.
Makron bilan suhbatda Eron prezidenti AQShning Eronga o‘tkazayotgan bosimini "terrorizm va iqtisodiy urush" deb atagan.

Avvalroq Eron oliy yetakchisining maslahatchisi Ali Akbar Viloyatiy Eron yevropalik hamkorlar yadroviy kelishuv bo‘yicha o‘z majburiyatlarini bajarmaganligiga javob sifatida navbatdagi qadamni tashlashi va 7 iyuldan uranni 5%gacha boyitishni boshlashini bildirgandi.