Maduro Venesuela muxolifati bilan muzokaralar boshlanganini ma'lum qildi

Venesuela prezidenti Nikolas Maduro mamlakat muxolifati bilan muzokaralar jarayoni boshlanganini ma'lum qildi.  

Muzokaralar Barbados orolida bo‘lib o‘tmoqda, ularda shuningdek Norvegiya hukumati vakillari ishtirok etmoqda. 

Tomonlar Venesueladagi iqtisodiy, siyosiy, madaniy va ijtimoiy sohalarga tegishli 6 ta masalani muhokama qilishi kutilmoqda.

Maduroning aytishicha, u muzokaralarga katta umid bilan qaramoqda. “Bugun muzokaralar 5 soat davom etdi, qadamma-qadam Venesuela uchun tinchlik, sermahsul muloqot yo‘lini ochishimiz mumkin”, deb aytgan Venesuela prezidenti.

Lotin Amerikasi davlatidagi vaziyat ommaviy noroziliklardan keyin muxolifat yetakchisi Xuan Guaydo o‘zini vaqtinchalik prezident deb e'lon qilgandan so‘ng keskinlashgandi.