Toshkent shahrida tashqi reklamani joylashtirish uchun yig‘imlar miqdori tasdiqlanadi

Normativ-huquqiy hujjatlar loyihalari muhokamasi portalida “Toshkent shahrida tashqi reklamani joylashtirish uchun yig‘imlar undirish vaqtinchalik tartibini belgilash va 2019 yil uchun yig‘im stavkalari to‘g‘risida”gi hujjat loyihasi e'lon qilindi.

Qayd etilishicha, O‘zbekiston Respublikasi Vazirlar Mahkamasining 2019 yil 9 iyuldagi 05/1-654-son munosabat belgisiga Toshkent shahrida tashqi reklamani joylashtirish uchun yig‘imlarni undirish tartibi va yig‘imlar miqdori bo‘yicha Toshkent shahar hokimligining taklifiga rozilik berilgan.

Toshkent shahrida tashqi reklamani joylashtirish uchun yig‘imlar miqdori tasdiqlanadi.

Tashqi reklamani joylashtirish uchun yig‘im undirish tartibi tasdiqlangunga qadar Toshkent shahrida tashqi reklamani joylashtirish huquqini berish bo‘yicha ishlar (shartnomalarni tuzish, yig‘imlarni undirish, hisobini yuritish va boshqalar)ni Toshkent shahar hokimligi ta'sischiligidagi “Poytaxt reklama servis” DUK zimmasiga yuklatiladi.

Toshkent shahrida tashqi reklamani joylashtirish huquqi uchun 2018 yil 1 dekabridan yig‘iladigan yig‘imlarning 10 foizini “Poytaxt reklama servis” DUK ixtiyoriga, 90 foizini Toshkent shahar mahalliy budjetiga yo‘naltirilishi belgilanadi.