Uimbldon finalida Federer va Jokovich uchrashadi

Londonda o‘tayotgan Uimbldon musobaqasining finalida 37 yoshli Rojyer Federer 32 yoshli Novak Jokovich bilan uchrashadigan bo‘ldi.

Jahonning 3-raqamli tennischisi Federer yarimfinalda 2-raqamli tennischi Rafael Nadalni 7:6 (7:3), 1:6, 6:3, 6:4 hisobida mag‘lub etdi. Tennischilar ATP turnirlarida o‘zaro 40-marta uchrashishdi, Federer 16-g‘alabaga erishdi, Nadal hisobida esa 24 ta g‘alaba bor.  

Yana bir e'tiborli jihati, Federer Uimbldondagi 101-g‘alabasini qo‘lga kiritdi. Bu esa “Katta dubulg‘a” musobaqalari uchun rekord natija hisoblanadi.

Ikkinchi yarimfinalda Novak Jokovich Roberto Bautistu-Agutani 4 ta setda mag‘lub etdi. Serbiyalik tennischi Uimbldonning amaldagi g‘olibi hisoblanadi.

Ayollar o‘rtasidagi finalda esa amerikalik Serena Uilyams va ruminiyalik Simona  Xalep uchrashadi.

133-marta o‘tkazilayotgan musobaqa 14 iyulda yakunlanadi. Musobaqaning mukofot jamg‘armasi 49,43 mln dollarni tashkil qiladi.