Piyodalar o‘tish joylariga ham kuzatuv kameralari o‘rnatish taklif etildi

“Mening fikrim” jamoaviy murojaatlar portalida piyodalar o‘tish joylariga kuzatuv kameralarini o‘rnatish haqida petitsiya e'lon qilindi.

“Shaharlarimiz ko‘chalarida kuzatuv kameralari ishga tushganiga mana ikki yarim yildan ortiq vaqt o‘tdi. Bugunga kelib, kuzatuv kameralari aniqlayotgan qoidabuzarliklarning soni yettitaga yetgan, lekin bu kameralarning 90 foizdan ko‘prog‘i svetoforlarning atroflariga qo‘yilgan”, - deyiladi murojaatda. 

Bildirilishicha, hozirda kamera bo‘lmagan joylarda, ayniqsa piyodalar o‘tish joylari (yo‘l qatnov qismining piyodalar kesib o‘tishi uchun mo‘ljallangan, 5.16.1, 5.16.2 yo‘l belgilari va 1.14.1 — 1.14.3 yo‘l chiziqlari bilan ajratilgan bo‘lagi)da qoidalarga rioya qilmaydigan haydovchilar tobora ko‘payib ketmoqda.

“Yuqoridagilarni inobatga olgan holda, piyodalar o‘tish joylariga kuzatuv kameralarini o‘rnatishni taklif qilamiz”, - deb yozadi petitsiya muallifi.