Stadion The Line - «Koʻzguli chiziq» deb ataluvchi ulkan shahar loyihasining bir qismi boʻlishi kerak edi. Dastlabki rejada uzunligi 170 kilometrga yetadigan ushbu chiziqsimon shahar NEOM megaloyihasining markaziy obyekti sifatida taqdim etilgan.
Arena esa baland inshoot tarkibida, yer sathidan taxminan 350 metr yuqorida joylashishi koʻzda tutilgan. Saudiya Arabistonining jahon chempionatini oʻtkazish uchun bergan arizasida u «dunyodagi eng noyob stadion» sifatida taʼriflangan.
Reuters vaziyatdan xabardor manbalarga tayanib, loyiha nomaʼlum muddatga toʻxtatilganini xabar qildi. Biroq Saudiya rasmiylari stadion qurilishining toʻxtatilishi haqida ochiq bayonot bermagan.
Bu xabar The Line loyihasining oʻzi ham kechikishlar va koʻlamni qisqartirish jarayonini boshdan kechirayotgan bir paytda tarqaldi. Shu bois uni dastlab rejalashtirilgan hajmda amalga oshirish istiqboli ham savol ostida qolmoqda.
NEOM stadioni 2034-yilgi jahon chempionati uchun taklif etilgan 15 arenadan biri edi. Saudiya Arabistoni turnirni Ar-Riyod, Jidda, Al-Xubar, Abha va NEOM hududlarida oʻtkazishni rejalashtirgan.
Dastlabki rejalarga koʻra, musobaqagacha 11 ta yangi stadion qurilishi, yana toʻrtta mavjud arena esa rekonstruksiya qilinishi yoki kengaytirilishi kerak.
Hozircha NEOM stadioni oʻrniga boshqa arena taklif etiladimi yoki turnirda foydalaniladigan stadionlar soni kamayadimi - maʼlum emas. Boshqa stadionlardagi qurilish va yangilash ishlari esa davom etmoqda.
2025-yilda Saudiya Arabistoni Davlat investitsiya jamgʻarmasi The Line loyihasining iqtisodiy maqsadga muvofiqligini baholash uchun maslahatchilarni jalb qilgan edi. Bu qadam ulkan loyiha xarajatlari va koʻlami qayta koʻrib chiqilayotganining belgisi sifatida baholangan.
