Qashqadaryoda sel suv ombori quriladi

Vazirlar Mahkamasining “Qashqadaryo viloyati Kitob tumanida Ayoqchi sel suv omborini qurish” loyihasini amalga oshirish chora-tadbirlari to‘g‘risida”gi qarori qabul qilindi.

Hujjatda qayd etilishicha, bosh loyiha tashkiloti “O‘zsuvloyiha” aksiyadorlik jamiyati tomonidan 16,8 mln kub m. hajmdagi sel suv ombori qurilishi nazarda tutilgan “Qashqadaryo viloyati Kitob tumanida Ayoqchi sel suv omborini qurish” loyihasining texnik-iqtisodiy hisobi ishlab chiqilgan.

Qaror bilan “Qashqadaryo viloyati Kitob tumanida Ayoqchi sel suv omborini qurish” loyihasining texnik-iqtisodiy hisobi asosiy texnik-iqtisodiy ko‘rsatkichlari bilan tasdiqlandi.

Loyihani amalga oshirish bo‘yicha:

O‘zbekiston Respublikasi Suv xo‘jaligi vazirligining “Qashqadaryosuvqurilishinvest” davlat unitar korxonasi buyurtmachi etib belgilandi;

bosh pudrat tashkiloti belgilangan tartibda tender savdosi asosida aniqlanadi;

qurilishni yakunlash muddati 2023 yil 1 sentabr etib belgilandi.

O‘zbekiston Respublikasi Suv xo‘jaligi vazirligi bosh loyiha tashkiloti “O‘zsuvloyiha” aksiyadorlik jamiyati bilan birgalikda 2019 yilning 1 dekabriga qadar qaror tasdiqlangan texnik-iqtisodiy hisobga muvofiq ishchi hujjatlar sifatli ishlab chiqilishini hamda vakolatli ekspertiza organlaridan belgilangan tartibda ekspertiza xulosalari olinishini ta'minlaydi.

O‘zbekiston Respublikasi Investitsiyalar va tashqi savdo vazirligi, Iqtisodiyot va sanoat vazirligi, Moliya vazirligi talab etiladigan kapital qo‘yilmalarni:

joriy yilda O‘zbekiston Respublikasining 2019 yilga mo‘ljallangan Investitsiya dasturi doirasida ko‘zda tutilgan mablag‘lar hisobidan;

2020 - 2023 yillar davomida asosiy ko‘rsatkichlarni har yili aniqlashtirib, O‘zbekiston Respublikasining kelgusi yillar uchun Investitsiya dasturlari parametrlarini shakllantirish jarayonida inobatga olinishini ta'minlaydilar.

O‘zbekiston Respublikasi Qurilish vazirligi loyiha doirasida amalga oshiriladigan qurilish-montaj ishlari sifati yuzasidan belgilangan tartibda nazorat o‘rnatadi.

Belgilab qo‘yilishicha, O‘zbekiston Respublikasi suv xo‘jaligi vaziri Sh.R. Hamroyev hamda Qashqadaryo viloyati hokimi Z.Sh. Ro‘ziyev loyihani amalga oshirish uchun Davlat budjetidan ajratiladigan mablag‘lardan maqsadli va oqilona foydalanilishi hamda barcha zarur shart-sharoitlar yaratilishi, shuningdek, loyihaning o‘z vaqtida va sifatli amalga oshirilishi uchun shaxsan javobgardir.