Toshkent shahar xalq ta'limi bosh boshqarmasi tasarrufida bugungi kunda 287 ta umumiy o‘rta ta'lim muassasalari faoliyat yuritmoqda. Ular loyiha sig‘imiga ko‘ra umumiy quvvati 308739 nafar o‘quvchiga mo‘ljallangan bo‘lib, 2019-2020 o‘quv yili mazkur ta'lim muassasalarida jami 442906 nafar, ya'ni amaldagi quvvatiga nisbatan 134167 nafar ko‘p o‘quvchilar ta'lim-tarbiya olishi kutilmoqda. Bu haqda poytaxt hokimligi xabar berdi.
Qayd etilishicha, 2019-2020 o‘quv yilida 1-sinflarga jami 49598 nafar bola qabul qilinishi rejalashtirilgan. Bugungi kunda qariyb yigirma besh ming o‘quvchi qabul qilindi.
Vazirlar Mahkamasining joriy yil 7 iyundagi 469-sonli qarori asosida Toshkent shahridagi 81 ta umumta'lim maktablarida 2019-2020 o‘quv yilida 1-sinfga bolalarni qabul qilish Davlat xizmatlari markazlari orqali amalga oshirilishi yo‘lga qo‘yildi. Qarorga ko‘ra, qabul jarayoni Asosiy va Qo‘shimcha kvota hisobidan amalga oshiriladi. Shu o‘rinda, asosiy kvota - bu tuman hokimliklari tomonidan belgilangan mikrohududda yashovchi doimiy ro‘yxatdagi fuqarolarning joriy yili 31 dekabrigacha 7 yoshga to‘ladigan farzandlari.
2019-2020 o‘quv yilida 1-sinfga asosiy kvota bo‘yicha jami 7910 nafar bola qabul qilinishi rejalashtirilgan va 1 avgust holatiga 3772 nafar bolalar Davlat xizmatlari markazi orqali qabul qilingan.
Qo‘shimcha kvota - maktablarning imkonidan kelib chiqib, mikrohududdan tashqarida yashayotgan maktab yoshidagi mikrohudud va mikrohududdan tashqari maktab yoshiga yetmagan (yilning 1 sentyabrigacha 6 yoshga to‘luvi), maktablarda ta'lim berish tili bo‘yicha boshlang‘ich bo‘limga ega bo‘lmagan bolalarga ajratiladi. Hozirda jamoatchilik taklifi asosida Xalq ta'lim va Adliya vazirligi tomonidan yuqoridagi qarorga o‘zgartirish kiritish to‘g‘risidagi qaror loyihasi tayyorlangan. Loyiha 27.07.2019 yilda jamoatchilik muhokamasiga qo‘yilgan.
Qaror loyihasida qo‘shimcha kvota asosida qabul tartibi belgilangan. Shu bilan birga pullik qabul tartibni bekor qilish taklif etilgan. Shuningdek, Toshkent shahar hokimining 2019 yil 5 avgustdagi 1068-sonli qarori asosida faoliyati tugatilayotgan 4 ta kasb-hunar kollejlari ham bosh boshqarma tasarrufiga o‘tishi munosabati bilan yangi o‘quv yilida yangi maktablar tashkil etiladi.
Xususan, endilikda Mirobod kompyuter texnologiyalari kasb-hunar kolleji binosida 56-sonli umumta'lim maktabi, Mirobod sanoat kasb-hunar kolleji o‘rnida 65-sonli umumta'lim maktabi, Toshkent moliya va iqtisodiyot kolleji binosida 68-sonli umumta'lim maktabi, Yunusobod kompyuter-texnologiya kasb-hunar kolleji o‘rnida 72-umumta'lim maktabi ish boshlaydi.
