Sarrida zotiljam borligi aniqlandi

«Yuventus» bosh murabbiyi Mauritsio Sarri zotiljam (o‘pka yallig‘lanishi) xastaligiga chalingan. Bu haqda Turin klubi rasmiy sayti ma'lum qildi.

Shifokorlar 60 yoshli murabbiyga maxsus terapiya tayinlashdi. Yaqin vaqtlarda Sarri jamoani boshqara olmaydi.

Eslatib o‘tamiz, «Yuventus» Italiya A Seriyasining 1-turini mehmonda «Parma»ga qarshi o‘tkazadi. Bahs 24 avgust kuni «Ennio Tardini» o‘yingohida Toshkent vaqti bilan 21:00da start oladi.

Sarri «Yuventus»ga shu yil iyunida bosh murabbiy etib tayinlangandi. Italiyalik mutaxassisning shartnomasi 2022 yil 30 iyunga qadar mo‘ljallangan. Murabbiy o‘tgan yili «Chelsi» klubini Yevropa ligasida chempionlik sari boshlab borgan edi.