9 yoshli xitoylik qiz 26 kilometrlik bo‘g‘ozni suzib o‘tdi

9 yoshli xitoylik qiz Chjou Ixan Xitoyning Xaynan oroli va qit'adagi Guandun viloyatini ajratib turuvchi Tsyunchjou bo‘g‘ozini suzib o‘tishga muvaffaq bo‘lgan eng yosh suzuvchi bo‘ldi. 

Qiz 26,7 kmlik masofani 13 soatda mustaqil ravishda suzib o‘ta oldi. Uning urinishi haqiqatan murakkab bo‘lgan – sportchini masofani suzib o‘tish davomida meduzalar chaqqan va kuchli oqim olib ketgan. 

“Meduza meni boshlang‘ich nuqtadan bir kilometr narida birinchi marta chaqdi. Bu 20 dan ko‘proq marta yuz berdi va biroz tashvishlantirdi. Mening murabbiyim va otam meduzalarni haydash uchun navbati bilan oldimda suzib borishdi”, deb aytgan qizcha. 

Ixan bilan bo‘g‘ozni yana 9 katta yoshli odam suzib o‘tishga uringan. Biroq ulardan 3 nafarigina buning uddasidan chiqqan. Har bir ishtirokchi ortidan kater kuzatib borgan, biroq unga ko‘tarilish taqiqlangan bo‘lgan.

Qizning otasi katerlardan birida bo‘lgan, u qizini bir necha marta to‘xtashga chaqirgan, biroq Ixan matonat bilan suzishda davom etgan. Aynan otasi unga o‘rnak bo‘lgan: u 2018 yilda ushbu bo‘g‘ozni 8 soatda suzib o‘tishga muvaffaq bo‘lgan.  

Yosh sportchiga 3 soat kamroq vaqt talab etilishi kutilgandi, biroq ko‘plab g‘ovlar sababli suzish cho‘zilib ketgan.