Tramp Zelenskiyga bosim o‘tkazmaganini ma'lum qildi 

Vashington Kiyev AQShning sobiq vitse-prezidenti Jozef Baydenning o‘g‘li harakatlarini tergov qilishdan bosh torsa, Ukrainaga moliyaviy yordam berishni to‘xtatish bilan tahdid qilmagan. AQSh prezidenti Donald Tramp jurnalistlar savoliga javoban shunday bayonot berdi.

“Men so‘ramaganman. Men “shu ishni qilishingiz kerak, yo‘qsa yordam bermayman”, deb aytmaganman. Men bunday qilmasdim ham”, deb aytgan Tramp.

Avvalroq Tramp Ukraina prezidenti Vladimir Zelenskiy bilan iyuldagi suhbati vaqtida unga bosim o‘tkazgani haqida xabar qilingandi.

Bundan tashqari, Tramp Oq uy Zelenskiy bilan suhbatining stennogrammasini e'lon qilishi mumkinligini aytgan. “Siz suhbat nima haqida bo‘lganini ko‘rganingizda va siz uni ko‘rasiz deb umid qilaman, men bunday qilmaganimga iqror bo‘lasiz. Siz bunga iqror bo‘lgach, pushaymon qilasiz”, deb aytgan AQSh prezidenti. 

Uning ta'kidlashicha, u Zelenskiy bilan suhbati matnini e'lon qilishni hech qanday muammosiz buyurishi mumkin, biroq yomon o‘rnak bo‘lmaslik uchun buni qilishni istamaydi. “Buni osongina qilishim mumkin. Biroq xorijiy yetakchilar bilan boshqa suhbatlarimni hisobga olib, buni qilishni istamasdim. Buni qo‘ng‘iroq men tomondan ham, u tomondan ham [Zelenskiy] beziyon bo‘lgani uchun qila olaman. Biroq boshqa davlatlar yetakchilari bilan suhbatlar mazmunini ochiqlashni yaxshi o‘rnak bo‘ladi, deb hisoblamayman”, deb qo‘shimcha qilgan Tramp. 

AQSh prezidentining ta'kidlashicha, Kiyev ham Zelenskiyga bosim bo‘lmaganini aytgan.

Avvalroq Tramp qo‘ng‘iroq vaqtida Ukrainadagi korrupsiya haqida suhbatlashgani va bu mazmunda Baydenni eslab o‘tganini ma'lum qilgan. 

Trampning 2020 yilgi prezident saylovlari bo‘yicha raqibi bo‘lgan Jo Bayden Trampning Zelenskiy bilan suhbati matnini e'lon qilishni talab qilgandi. Biroq AQSh davlat kotibi Mayk Pompeo Tramp va Zelenskiyning suhbati maxfiy xarakterga ega ekanligini va shu sababli uning matni e'lon qilinmasligini ma'lum qilgan.