3 hafta avval vafot etgan Zimbabvening sobiq prezidenti Robert Mugabe poytaxt Xararedan 90 km uzoqlikda joylashgan ona qishlog‘i Kutamada dafn etildi.
Marosimda marhumning yaqinlari ishtirok etishi ko‘zda tutilgan bo‘lsa-da, sobiq prezident bilan vidolashgani bir necha yuzlab odamlar kelgan. Marosimda hokimiyatning biror vakili ishtirok etmagan.
Mugabening dafn etilishi borasida uning yaqinlari va hokimiyat o‘rtasida bahs yuzaga kelgan. Hokimiyat marhumning Xararedagi qahramonlar xiyobonida dafn etilishini istagan. Biroq Mugabening yaqinlari uni ona qishlog‘ida dafn etishni talab qilishgan.
Mugabe 6 sentyabrda 95 yoshida Singapurdagi shifoxonada vafot etgandi. U mamlakatni 30 yil davomida boshqarib kelgan. 2017 yil mamlakatda yuz bergan harbiy to‘ntaruvdan keyin hokimiyatdan chetlatilgan.
