Inomjon Majidov hududlarda kadrlar yetishmovchiligi muammosiga izoh berdi

Oliy va o‘rta maxsus ta'lim vaziri Inomjon Majidov 30 oktabr kuni Senatning Fan, ta'lim va sog‘liqni saqlash masalalari qo‘mitasida vazirlikning joriy yil 9 oyidagi faoliyati yuzasidan hisobot berdi. Bu haqda Kun.uz muxbiri xabar bermoqda.

Majidovga ko‘ra, oliy ta'lim muassasalariga kvotalarning 30 foizi davlat buyurtmasi ─ grant hisoblanadi. Grant asosida tahsil olgan bitiruvchilar 3 yil davomida o‘z sohasida faoliyat yuritish majburiyatini olishi belgilangan. Ammo, shunga qaramay, hududlarda kadrlar yetishmovchiligi kuzatilmoqda.

«Biz grant asosida tahsil olgan bitiruvchilarni shu soha mutaxassisiga ehtiyoj yuqori bo‘lgan hududga yuborishimiz mumkin. Ammo uning yashashi uchun sharoit yaratishni bo‘ynimizga ololmaymiz. Bu – ish beruvchi bilan bog‘liq masala. Turar joyi, ishga qatnaydigan masofasi, yashash sharoiti olayotgan oyligiga nomutanosib bo‘lsa, kadrlarning ham u yerda qolgisi kelmaydi.

Bu masala bilan mahalliy hokimliklar shug‘ullanishi kerak. Idoraviy uylardan yosh mutaxassislarga joy ajratilsa, sharoit qilib berilsa, balki u o‘sha yerda qolib ishlashi mumkin», ─ deydi Inomjon Majidov.

Vazirning qo‘shimcha qilishicha, har yili Iqtisodiyot vazirligi tomonidan hududlarda qaysi soha xodimlariga qancha ehtiyoj borligi o‘rganiladi, shundan kelib chiqqan holda OTMlar uchun kvota belgilanadi. Ammo mavjud ehtiyojning barchasini qoplaydigan darajada kvota ochish imkonsiz.

Yig‘ilishda so‘zga chiqqan senator Shohida Oripovaning ta'kidlashicha, hududlarda kadrlar taqsimoti bo‘yicha Oliy va o‘rta maxsus ta'lim vazirligida chuqur tahlilning yo‘qligi bois kadrlar yetishmovchiligi bilan bir vaqtda bitiruvchilarning ishsiz qolishi ham kuzatilmoqda.

«Nafaqat oliy ta'lim muassasalari, o‘rta ta'limda ham qanchalab mutaxassis tayyorlanadi. Bir tomonda kadr yetishmayapti, bir tomonda qanchalab hamshira, pedagog ishsiz qolgan. Bularning hammasi chuqur tahlilning yo‘qligi bilan bog‘liq», ─ deydi senator.

Eslatib o‘tamiz, sentabr oyida Senatning ayni shu qo‘mitasi majlisida so‘z olgan Mehnat vaziri o‘rinbosari Bahodir Umrzoqov yosh shifokorlarga qishloqlarda tekin uy-joy berishni taklif qilgan edi.