O‘zbekiston Respublikasi Prezidenti Shavkat Mirziyoyev raisligida 22 noyabr kuni qishloqlar va shaharlarda aholini uy-joy bilan ta'minlashning yangi tizimini joriy etish bo‘yicha amalga oshiriladigan chora-tadbirlar muhokamasiga bag‘ishlangan videoselektor yig‘ilishi bo‘lib o‘tdi.
Prezident yig‘ilishda davlat idoralari rahbarlarining ommaviy axborot vositalari xodimlari bilan munosabatlari masalasiga ham to‘xtalgan.
«Bugun sizlar bilan yana bir muhim masalani muhokama qilib olishimiz zarur.
Barchangiz ko‘rib, bilib turibsiz, bugun jamiyat hayotining barcha jabhalarida ochiqlik va shaffoflik ta'minlanmoqda. Zamon tez rivojlanmoqda, xalqimizning dunyoqarashi o‘zgarmoqda», — degan prezident.
O‘z chiqishida bu borada ayniqsa, ommaviy axborot vositalari katta rol o‘ynayotgani, ular hayotiy muhim masalalarga e'tiborni qaratib, muammolarni hal etishda ko‘maklashayotganini ta'kidlab, shunday degan:
«Demokratik jamiyatning asosiy talablaridan biri ham shu.
Shuni esdan chiqarmaylik, matbuotni faoliyatimizni aks ettiruvchi ko‘zgu deb bilishimiz kerak. Afsuski, ko‘p yillar davomida biz ana shu ko‘zguga qarashni o‘zimizga ep ko‘rmadik.
Oqibatda haqiqiy qiyofamizni ko‘rolmay qoldik. Xalqimizga ochiq-oydin ma'lum bo‘lib turgan aybu nuqsonlarimizni tan olmasdan, «men hammadan zo‘rman» deb o‘zimizga bino qo‘yib, kekkayib yuraverdik. «Yuzing qiyshiq bo‘lsa, oynadan o‘pkalama» degan dono maqolni butkul unutib qo‘ydik.
Yillar davomida jamiyatimizda qanchadan-qancha illatlarning tomir otishi, muammolarning yig‘ilib qolishining asosiy sabablaridan biri ham shu bo‘lgani, ayni haqiqat», — degan prezident.
Prezident bu gaplarni nima uchun aytayotganini hamma yaxshi tushunib turganiga urg‘u bergan.
«Bugun
