Rossiya Tergov qo‘mitasining Kabardino-Balkariya bo‘yicha boshqarmasi ma’lumotiga ko‘ra, Elbrus cho‘qqisiga ikki guruh - yetti nafar xorijlik va ikki nafar rossiyalik alpinist ko‘tarilgan.
Mintaqa Favqulodda vaziyatlar vazirligi «Elbrus 07» Telegram-kanali ma’lumotlariga tayanib, birinchi guruhdagi Bosniya va Hersegovinaning besh nafar fuqarosi, ikkinchi guruhda esa yana bir kishi halok bo‘lganini ma’lum qilgan.
Yetti kishidan faqat ikki nafari omon qoldi
25 iyul kuni kechqurun ob-havo keskin yomonlashishi oqibatida yetti nafar bosniyalikdan iborat guruh belgilangan yo‘nalishdan adashib qolgan.
Alpinistlardan biri pastga tushishga muvaffaq bo‘lib, 5100 metr balandlikda guruhning ikki a’zosi o‘zini yomon his qilgani va keyinchalik vafot etgani haqida xabar bergan.
Qutqaruv ishlari davomida mutaxassislar guruhning yana bir tirik qolgan a’zosini topgan. Shuningdek, yana uch nafar alpinistning jasadi aniqlangan. Shu tariqa yetti kishilik guruhdan ikki kishi omon qolgan, besh kishi halok bo‘lgan.
Shamol tezligi soatiga 70 kilometrga yetgan
Baza Telegram-kanali ma’lumotlariga ko‘ra, bosniyalik alpinistlar guruhi rasman ro‘yxatdan o‘tgan va uning a’zolari tog‘larga chiqish tajribasiga ega bo‘lgan.
Biroq Elbrusda ob-havo juda tez yomonlashgan. Shamol tezligi soatiga taxminan 70 kilometrgacha kuchaygan va qor bo‘roni boshlangan. Xabarda aynan og‘ir ob-havo sharoiti fojianing asosiy sababi sifatida ko‘rsatilmoqda.
Bosniya va Hersegovina OAV ma’lumotlariga ko‘ra, ekspeditsiyaning yetti nafar a’zosi mamlakat markazidagi Zenitsa shahrida yashagan. Ular orasida er-xotin va shifokor ayol ham bo‘lgan.
Rossiya davlat axborot agentliklari ma’lumotlariga ko‘ra, yomon ob-havo tufayli kamida uch nafar halok bo‘lgan alpinistning jasadini hozircha tog‘dan olib tushish imkoni bo‘lmagan.
Hodisa yuzasidan Rossiya Tergov qo‘mitasining mintaqaviy boshqarmasi ikki yoki undan ortiq shaxsning ehtiyotsizlik oqibatida o‘limiga sabab bo‘lish moddasi bo‘yicha jinoyat ishi qo‘zg‘atgan.
Ikkinchi guruhda ham bir kishi halok bo‘ldi
26 iyul kuni Elbrusga ko‘tarilgan yana ikki nafar alpinist 5300 metr balandlikda yordam so‘ragan.
Qutqaruvchilar yetib kelguniga qadar ulardan biri vafot etgan, ikkinchisi esa evakuatsiya qilingan.
Baza ma’lumotiga ko‘ra, ular Stavropol o‘lkasi va Tula viloyatidan kelgan sayyohlar bo‘lgan. Ulardan biri sovuq qotishi oqibatida halok bo‘lgani aytilmoqda.
Uning jasadi ham ob-havo sharoiti og‘irligi sababli hozircha tog‘da qolmoqda.
Elbrus haqida
Elbrus Rossiya va Yevropaning eng baland tog‘i hisoblanadi. Uning ikki cho‘qqisi mavjud: Sharqiy cho‘qqi balandligi 5621 metr, G‘arbiy cho‘qqi esa 5642 metrni tashkil etadi.
Ikki cho‘qqi 5416 metr balandlikdagi nisbatan tekis egarsimon qism bilan ajralib turadi. Cho‘qqilar orasidagi masofa taxminan 1,5 kilometrni tashkil etadi.
Elbrusdagi osma yo‘l sayyohlarni 3847 metr balandlikkacha olib chiqadi. Undan yuqoriga alpinistlar piyoda yoki maxsus gusenitsali transport vositalarida harakatlanadi.
