Toshkent davlat sharqshunoslik instituti Hindiston universitetlari bilan hamkorlikni kuchaytiradi

Toshkent davlat sharqshunoslik instituti delegatsiyasi Hindistonning Gujarat shtatidagi yetakchi universitet - Gujarat universitetiga tashrif buyurdi. Universitet 1947 yilda tashkil etilgan bo‘lib, shtatning eng qadimiy va yirik universiteti hisoblanadi.

Universitet va ixtisoslashgan kafedralar rahbariyati bilan bo‘lgan uchrashuvda o‘zaro hamkorlik imkoniyatlari muhokama qilindi. Uchrashuv yakunida hamkorlik to‘g‘risida memorandum imzolandi, unda nafaqat o‘qituvchilar va talabalar almashinuvi, qo‘shma o‘quv va ilmiy tadbirlar o‘tkazilishi, balki 2020-2021 o‘quv yilidan boshlab filologiya ixtisosligi bo‘yicha o‘qiyotgan TDShI hindshunos magistrantlari uchun ikki tomonlama diplomlar dasturini (1+1) ochish, 2020 yilda TDShIda Gujarat universiteti Smart sinfini tashkil etish ham nazarda tutilgan, dedi TDShI xalqaro hamkorlik bo‘yicha prorektori Elyor Mahmudov.

TDShI delegatsiyasi Gujarat universitetining Startaplar va tadbirkorlar kengashi faoliyatiga katta qiziqish bildirdi. Kengashning 3 yillik faoliyati davomida universitetda 120ta startap kompaniyalar tashkil etildi, ularning 50 foizga yaqini universitet talabalariga tegishli.

TDShI delegatsiyasining Hindistonga tashrifi doirasida Hindiston Ta'lim vazirligi huzuridagi urdu tilini targ‘ib qilish bo‘yicha Milliy kengash rahbariyati bilan uchrashuv bo‘lib o‘tdi. Sharqshunoslik institutida urdu tili sohasida olib borilayotgan ilmiy tadqiqotlarni qo‘llab-quvvatlash, natijalarini keyinchalik nashr etish, shuningdek, urdu tilidagi o‘quv va ilmiy adabiyotlar bilan ta'minlash bo‘yicha kelishuvga erishildi.

Jamiya Millia Islomia universiteti bilan hamkorlik to‘g‘risida memorandum imzolandi va hamkorlikning asosiy yo‘nalishlari belgilandi. Ushbu universitet Hindistonda o‘zbek tili o‘qitiladigan yagona ta'lim dargohidir.

Tashrif doirasida TDShI delegatsiyasi mamlakatning yetakchi universitetlari - Dehli va Javoharlal Neru oliygohlari bilan memorandumlar imzolashni rejalashtirmoqda.