Abdulaziz Komilov Italiyaga boradi

2019 yilning 11-13 dekabr kunlari O‘zbekiston Respublikasi tashqi ishlar vaziri Abdulaziz Komilov boshchiligidagi delegatsiya Italiya Respublikasiga tashrif buyuradi.

Tashrif dasturiga ko‘ra, Rim shahrida tashqi ishlar va xalqaro hamkorlik vaziri Luiji Di Mayo va boshqa rasmiy shaxslar bilan uchrashuvlar o‘tkazish va ikki tomonlama munosabatlarni yanada rivojlantirish istiqbollarini muhokama qilish ko‘zda tutilgan.

Tashrif doirasida Vatikanda bo‘lish va arxiyepiskop Pol Richard Gallaxer bilan muzokaralar o‘tkazish rejalashtirilgan.

Italiyada bo‘lish chog‘ida O‘zbekiston delegatsiyasi «Italiya – Markaziy Osiyo: o‘zaro tushunish, hamkorlik va sheriklikni mustahkamlash» xalqaro konferensiyasida ishtirok etadi, deyiladi Tashqi ishlar vazirligi ma'lumotida.