Tosh-hovli majmuasida o‘rnatilgan alyuminiy rom bo‘yicha ish prokuraturaga oshiriladi

Xiva shahridagi Tosh-hovli majmuasida alyuminiy profildan yasalgan romning o‘rnatilishi prokuratura tomonidan o‘rganiladi. Bu haqda Madaniyat vazirligi xabar bermoqda.

Bildirilishicha, Vazirlar Mahkamasining 2019 yil 30 martdagi 265-sonli qarorining 11-ilovasi asosan Madaniyat vazirligi huzuridagi Madaniy meros departamenti Kengashining madaniy meros obektlarida olib boriladigan har qanday ta'mirlash va tiklash ishlari bo‘yicha bajariladigan ishlar smeta loyihalari taqdim etilgan holda ilmiy xulosa olish belgilangan.

Madaniyat vazirligi tomonidan Xiva shahridagi Ichanqal'a muzey qo‘riqxonasi hududidagi Tosh-hovli majmuasiga o‘rnatilgan alyuminiy profildan yasalgan rom Ilmiy-ekspert Kengashidan ruxsat olmasdan o‘rnatilgani aniqlangani aytiladi.

Qayd etilishicha, bu holat yuzasidan dalolatnoma tuzilib, o‘rganib chiqildi va mavjud muammo bartaraf etildi. Vazir topshirig‘i bilan hujjatlar respublika prokuraturasiga oshiriladi, madaniy meros obektlariga yetkazilgan zarar uchun aybdorlar javobgarlikka tortiladi.