Angrenda talonchilik sodir etgan shaxslar ushlandi

Toshkent viloyatining Angren shahri Qorabog‘ ko‘chasida yashovchi, 1938 yilda tug‘ilgan fuqaro S.S. IIBga ariza bilan murojaat qilgan, deb xabar bermoqda IIV axborot xizmati.

U shu kuni soat 03:00larda uyida uxlab yotganida shovqindan uyg‘onib ketgani va 3 nafar noma'lum shaxs yotoqxonasidagi temir sandiq ichidan 5.000.000 so‘m puli va 20.000 AQSh dollarini olib voqea joyidan qochayotganliklarini ko‘rganligini ma'lum qilgan. Ushbu holat yuzasidan O‘zbekiston Respublikasi Jinoyat kodeksining 166-moddasi 3-qismi (talonchilik) bilan jinoyat ishi qo‘zg‘atilgan.

Ko‘rilgan choralar natijasida yuqoridagi jinoyatni Angren shahar Appartak ko‘chasida yashovchi, muqaddam sudlangan 1983 yilda tug‘ilgan fuqaro A.E., shu ko‘chada yashovchi 1992 yilda tug‘ilgan fuqaro U.M., Qayrag‘och ko‘chasida yashovchi, muqaddam sudlangan 1977 y.t. fuqaro T.R., 14-dahada yashovchi, muqaddam sudlangan fuqaro 1998 y.t. O.M. va Suxrat ko‘chasida yashovchi, 1990 y.t. I.J. sodir etganliklari aniqlanib, U.M., I.J. va A.E. ushlanganlar. 

Tergov harakatlari davom etmoqda, deyiladi ma'lumotda.