Otabek Nuritdinovning advokati sud qaroriga munosabat bildirdi

2019 yil 4 yanvar kuni Andijon viloyat ma'muriy sudi kassatsiya instansiyasining ochiq sud majlisida fuqaro Abdufatto Nuritdinov (bloger Otabek Nuritdinov)ga nisbatan chiqarilgan 15 sutka ma'muriy qamoq jazosi o‘zgarishsiz qoldirildi.

Sud A. Nuritdinovning kassatsiya tartibida berilgan shikoyatini rad qilib, qanoatlantirilmasdan qoldirish va Andijon viloyat ma'muriy sudi tomonidan 2019 yil 30 dekabrdagi unga nisbatan chiqarilgan qarorni o‘zgarishsiz qoldirish haqida qaror qabul qilgan.

Kun.uz muxbiri Abdufatto Nuritdinovning advokati Umidbek Davlatovdan holat yuzasidan izoh berishni so‘radi. 

«Sudyadan ma'muriy ishni butunlay..., birinchi bosqich sudining chiqargan ma'muriy qarorini bekor qilib, ishni harakatdan tugatib, A.Nuritdinovga nisbatan ariza yozganlarga nisbatan qonuniy chora, ya'ni tuhmat bilan ariza yozganligi uchun qonuniy chora ko‘rishni talab qildim. Buni asoslab ham berdim, mana shuncha guvohlar, inobatga olmadi.

Bu yerda protsessual qoidabuzarliklar juda ko‘p bo‘ldi. Birinchidan, sud majlisi ochiq deb e'lon qilindi, ochiq deb e'lon qilinishi bilan sudya o‘zining kimligini, sud tarkibini tanishtirmasdan turib videokamerani kiritish bo‘yicha iltimosnomaning muhokamasiga o‘tib ketdi. Undan so‘ng mening o‘zim «ism-familiyangizni yozib qo‘yay», degandan keyingina o‘zining shaxsi to‘g‘risida ma'lumot berdi. Protsessual qoidabuzarliklar juda ko‘p, bu qonun bo‘yicha qabul qilingan sud qarorining bekor bo‘lishiga yuz foizlik asos bo‘ladi. 

Keyingi harakatlar - sudning qarorini olganimizdan so‘ng O‘zbekiston Respublikasi Oliy sudi, Ma'muriy ishlar bo‘yicha sudlov hay'atiga nazorat tartibida shikoyat bildirish. Sud ajrimini qo‘limizga olishimiz bilan harakatni boshlaymiz», - dedi Abdufatto Nuritdinovning advokati. 

Eslatib o‘tamiz, 2019 yilning 30 dekabr kuni tuhmat, haqorat va mayda bezorilikda ayblangan A.Nuritdinovga nisbatan Andijon viloyati ma'muriy sudining qaroriga asosan Ma'muriy javobgarlik to‘g‘risidagi kodeks 40-moddasi bilan BHMning 30 baravari miqdorida 6.690.000 so‘m jarima jazosi, 41-moddasi bilan BHMning 30 baravari miqdorida 6.690.000 so‘m jarima jazosi, 183-moddasi bilan 15 sutka ma'muriy jazo belgilandi.