O‘zbekiston milliy jamoasi BAAda yig‘in o‘tkazib, o‘rtoqlik uchrashuvida maydonga tushadi

Vadim Abramov boshqaruvidagi O‘zbekiston milliy jamoasi 31 mart kungi Yamanga qarshi o‘yin oldidan yig‘in o‘tkazadi. Bu haqda O‘FA rasmiy sayti xabar bermoqda.

«Ushbu uchrashuvga jiddiy tayyorgarlik olib borish maqsadida terma jamoamiz fevral oyida BAAda yig‘in o‘tkazishi haqida oldinroq ma'lumot bergan edik. Bosh jamoamiz 18-24 fevral kunlari Dubayda yig‘in tashkil etadi. Mazkur yig‘in doirasida Belarus milliy jamoasi bilan o‘rtoqlik uchrashuvida maydonga tushiladi. O‘yin 23 fevral kuni Dubayda bo‘lib o‘tadi» - deyiladi xabarda.

Eslatib o‘tamiz, jahon chempionati-2022 saralashi ikkinchi bosqichi «D» guruhida O‘zbekiston milliy jamoasi 5 uchrashuvdan so‘ng 9 ochko jamg‘argan holda turnir jadvalining 1-pog‘onasini egallab turibdi.