Bahorning ilk kuni O‘zbekiston bunyodkorligi tarixi yirik hamkorlik bilan yodda qoladigan bo‘ldi. O‘zbekistonning shiddat bilan rivojlanayotgan Murad Buildings developerlik kompaniyasi Qozog‘istonning soha gigantlaridan biri bo‘lgan, yillik aylanma mablag‘i 1,5 mlrd. AQSh dollarini tashkil qiladigan BI Group kompaniyasi bilan yangi va o‘ziga xos uslubda ishlovchi – NRG bunyodkorlik kompaniyasiga asos soldilar.
Poytaxtning hashamatli Hilton mehmonxonasi anjumanlar zalida yirik bayram shaklida tashkillashtirilgan bu taqdimotda siyosatchilar, yirik tadbirkorlar, shou biznes vakillari va ko‘plab xorijiy hamda mahalliy mehmonlarni uchratish mumkin edi.
Taqdimot dastlabki soniyalaridanoq maqsadlarning naqadar ulkanligini ko‘rsatib bera oldi. Murad Buildings asoschisi va rahbari Murod Nazarov hamda BI Group direktorlar kengashi raisi Oydin Rahimboyevlar yangi tashkil qilinayotgan NRG bunyodkorlik kompaniyasining maqsad va vazifalari haqida so‘zlab berdilar.
Ma'lumot uchun: BI Group – Qozog‘istonning yirik developerlik kompaniyasi. Nafaqat bu davlatda, balki qator boshqa davlatlarda ham faoliyat yuritadi. 8 ming nafardan ortiq xodimlarga ega bu kompaniya 25 yildirki muvaffaqiyat bilan ishlab kelmoqda va shu davrga qadar 150 dan ortiq loyihada 5 mln.kv.m.dan ortiq turar-joy va biznes obektlarini qurib bitqazgan. Birgina 2019 yilning o‘zida kompaniya tomonidan 1,5 mln. kv.m.dan ortiq maydon foydalanishga topshirilgan va Murod Nazarovning bildirishicha, bu ko‘rsatkich bizdagi jami developerlik kompaniyalari hajmidan ko‘proqdir. Kompaniyaning yillik aylanmasi 1,5 mlrd. AQSh dollarini tashkil qiladi.
Taqdimotga tashrif buyurgan BI Group xoldingi boshqaruvi raisi Omongeldi Omarovning ma'lum qilishicha, kompaniya bir vaqtning o‘zida 150 dan ortiq obektlarda faoliyat olib boradi va sohaga mo‘ljallangan maxsus dastur orqali barchasi muttasil nazorat qilib boriladi. Kompaniya tomonidan maxsus yaratilgan “Smart remont” dasturi uylarni nafaqat qurishni, balki ichki dizayni, ta'mirlash va jihozlashni ham ko‘zda tutadi. Ayni mana shu dastur o‘tgan 5 oy davomida Qozog‘istonda mingdan ortiq, ya'ni oyiga 200ta xonadonni ta'mirlab, jihozlab tayyor holga keltirish imkonini bergan.
