14:09 / 03.03.2020
7
35319
Ўзбекистонга коронавирус кириб келиши ва тарқалишининг олдини олиш бўйича ҳаракатлар тартиби тасдиқланди

Ўзбекистон Республикаси Бош давлат санитария врачининг 2020 йил 27 февралдаги 2-сонли қарорига асосан 2020 йил 1 март кунидан бошлаб Ўзбекистон Республикасига коронавирус COVID-19 касаллигининг кириб келиши ва тарқалишини олдини олиш бўйича амалга ошириладиган ҳаракатлар алгоритмига асосан жорий этиладиган тартиб тасдиқланди

Фото: Pavel Mikheyev / Reuters

Қайд этилишича, Ўзбекистон Республикасига давлат чегарасидан кириб келаётган фуқаролар уларнинг қайси давлат фуқаролигидан қатъий назар COVID-19 коронавирус касаллиги бўйича эпидемик вазият мураккаб бўлган давлатлардан тўғридан-тўғри ёки бошқа давлатлар орқали кириб келаётган бўлса бу тартиблар жорий этилади. Агарда, фуқаролар “COVID-19” коронавирус касаллиги қайд этилмаган бошқа давлатларда 14 суткадан ортиқ вақт мобайнида истиқомат қилиб, сўнгра Ўзбекистон Республикасига кириб келаётган бўлса - уларга нисбатан карантин ва чекловлар жорий этилмайди.

1. Хитой Халқ Республикаси, Жанубий Корея Республикаси, Эрон Ислом Республикаси, Италия, Афғонистон Ислом Республикаси, Япония давлатларидан тўғридан-тўғри ёки бошқа давлатлар орқали, бир вақтда уюшган ҳолда кириб келганда фуқаролар 14 суткага карантинга олинади.

Истиснолар: расмий ва ҳукумат делегациялари аъзолари, шунингдек, хизмат ва дипломатик паспорт эгалари, авиакомпаниялар учувчилари ва экипаж аъзолари, локомотив бригадалар, темир йўл транспортининг транспорт фаолияти билан боғлиқ шахслар ва халқаро автоуловларда юк ташиш билан шуғулланадиган ҳайдовчилар.

Кириб келаётган фуқаролар давлат чегарасидан кириш жойида ҳудудий ҳокимият органлари томонидан белгиланган жойларга уюшган ҳолда автобусда олиб борилади, 14 сутка мобайнида узлуксиз равишда аҳолидан изоляция қилинади. Ушбу муассасаларда инсон ҳаёти учун зарур барча шарт-шароитлар яратилади. Фуқароларга карантин мобайнида карантинизация жойини тарк этишга рухсат берилмайди.

Тиббий ходимлар томонидан карантин мобайнида амалга ошириладиган чора-тадбирлар: тиббий кўрикдан ўтказиш, тана ҳароратини, артериал босимини ўлчаш, суриштирув ўтказиш. Тиббий кўрсатмаларга кўра лаборатория тадқиқоти учун бурун-ҳалқумидан биоматериаллар ва зарурият туғилганда бошқа усуллар учун намуналар олиниши мумкин.

Карантин тугагандан кейин (шифохонадан чиққандан кейин), 10 кун мобайнида тиббиёт ходими томонидан телефон орқали сўраш ўтказади.

Карантиндаги шахслар томонидан интизомни бузиш ҳолатлари кузатилса, маъмурий жавобгарликка тортиш белгиланган.

2. Хитой Халқ Республикаси, Жанубий Корея Республикаси, Эрон Ислом Республикаси, Италия, Афғонистон Ислом Республикаси, Япония, Франция, АҚШ, Германия, Сингапур, Испания, ХХР Гонконг, ХХР Макао, ХХР Тайван - уй шароитида изоляция. Бу давлатлардан келган шахслар охирги ташрифидан 14 кундан кам вақт ўтган бўлса тиббий чекловга олинади.

Истиснолар: расмий ва ҳукумат делегациялари, шунингдек хизмат ва дипломатик паспорт эгалари, авиакомпаниялар учувчилари ва экипаж аъзолари, локомотив бригадалар, темир йўл транспорти фаолияти билан боғлиқ шахслар ва халқаро автоуловларда юк ташиш билан шуғулланадиган ҳайдовчилар.

Фуқаролар 14 сутка давомида яшаш жойида (уй, меҳмонхона, ётоқхона, ва бошқалар) доимий равишда изоляцияда бўлиши лозим, оила аъзоларидан ташқари кишилар билан мулоқотда бўлмасликлари, аҳолининг оммавий тўпланадиган жойларига боришига рухсат этилмайди.

Тиббий ходимлар томонидан уй карантини (14 календар куни) мобайнида амалга ошириладиган чора-тадбирлар: тиббий кўрикдан ўтказиш, тана ҳароратини, артериал босимини ўлчаш, суриштирув ўтказиш; тиббий кўрсатмаларга кўра лаборатория ташхиси учун бурун-ҳалқумидан биоматериаллар ва зарурият туғилганда бошқа усуллар учун намуналар олиниши мумкин.

Клиник кўрсатмаларга асосан ўткир респиратор инфекция аломатлари аниқланган шахслар шифохона шароитида ташхиси ва даволаш мақсадида ётқизилади.

Тиббий чекловлар тугагандан сўнг (шифохонадан чиққандан кейин), 10 кун мобайнида тиббиёт ходими томонидан телефон орқали суриштириб турилади.

Тиббий чекловдаги шахслар томонидан интизомни бузиш ҳолатлари кузатилса, маъмурий жавобгарликка тортиш белгиланган.

3. Таиланд, Озарбойжон, Буюк Британия, Малайзия, БАА - яшаш жойида 14 кунлик тиббий назоратга. Шу жумладан экипаж аъзолари, локомотив бригадалар, темир йўл транспорти фаолияти билан боғлиқ шахслар ва халқаро автоуловларда юк ташиш билан шуғулланадиган ҳайдовчилар.         

Уларга аҳоли оммавий тўпланадиган жойларга бормаслик, одамлар билан мулоқотни мумкин қадар камайтириш бўйича тавсиялар берилади.

Ўзбекистон Республикаси чегарасини кесиб ўтгандан сўнг, 14 кун мобайнида яшаш жойидаги даволаш-профилактика муассасалари тиббий ходимлар томонидан тиббий назоратга олинади ва кейинги 10 кун давомида телефон орқали хабар олинади.

Яшаш жойидаги тиббий ходимлар томонидан ҳар куни тиббий назорат ўтказилади (тиббий кўрик, тана ҳароратини ва артериал босимини ўлчаш, сўров ўтказиш).

Клиник кўрсатмаларга асосан ўткир респиратор инфекция аломатлари аниқланган шахсларда шифохона шароитида ташхислаш ва даволаш мақсадида ётқизилади.

4. Баҳрайн, Кувайт, Арманистон, Белорусь, Уммон, Покистон, Грузия, Чехия, Ироқ, Ливан, Канада, Литва, Эстония, Руминия, Греция, Голландия, Норвегия, Австрия, Дания, Швеция - шахслар соғлик ҳолатини дистанцион мониторинги.

Бу тоифадаги давлатлардан келган шахслар охирги ташрифидан 14 кундан кам вақт ўтган бўлса телефон орқали хабар олинади

Шахслар ҳудудий тиббиёт муассасаларга ўзи ҳақида хабардор қилган ҳолда, Ўзбекистон Республикаси ҳудуди бўйича ҳаракатланиш ҳуқуқига эга.

Уларга аҳолини оммавий тўпланган жойларига бормаслик, одамлар билан мулоқотни камайтириш бўйича тавсия берилади.

Тиббий ходим томонидан ҳар куни (24 кун давомида) телефон орқали саломатлик ҳолати сўралади.

Мавзу
Коронавирус
2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.
Барчаси
Ушбу хабарга фикрингизни билдиринг. Бунинг учун авторизациядан ўтишингиз керак!
Top