09:45 / 14.03.2020
14067
Билл Гейтс Microsoft директорлар кенгашини тарк этди

Шунингдек, тадбиркор Berkshire Hathaway инвестиция фонди директорлар кенгаши таркибидан чиқишга ва хайрия ишларига эътибор қаратишга қарор қилди. У Microsoft’да бош директорнинг маслаҳатчиси сифатида ишлашда давом этади

Фото: AP Photo/Markus Schreiber

Microsoft асосчиси Билл Гейтс компаниянинг директорлар кенгашини тарк этмоқда. Бу ҳақда унинг ўзи LinkedIn’даги саҳифасида маълум қилди.

«Microsoft ҳар доим менинг ҳаётимнинг муҳим қисми бўлиб қолади ва мен Сатя Наделла [корпорация бош директори] ҳамда техник раҳбарият билан компания қарашларини шакллантириш ва улкан мақсадларга эришиш бўйича ҳамкорлик қилишда давом этаман», - дея унинг сўзларини келтирган CNBC.

Корпорация хабарида айтилишича, тадбиркор кўпроқ вақтини соғлиқни сақлаш, таълим ва иқлим ўзгаришига қарши кураш соҳасидаги хайрия ишларига сарфламоқчи. Гейтс компанияда Наделла ва Microsoft’нинг бошқа раҳбарлари маслаҳатчиси сифатида ишлашни давом эттиради.

«Мен учун кўп йиллар давомида Билл билан бирга ишлаш ва ундан ўрганиш катта шараф бўлди. Директорлар кенгаши унинг раҳбарлиги туфайли жуда кўп ютуқларга эришди», - дея компания баёнотида Наделланинг сўзлари келтирилган.

Шунингдек, Гейтс Berkshire Hathaway инвестиция фонди директорлар кенгаши таркибидан чиқишини ҳам маълум қилди.

Гейтс Microsoft’га 1975 йилда тадбиркор Пол Аллен билан биргаликда асос солган. У 2008 йилга қадар компаниянинг бош директори бўлган - кейин Гейтс рафиқаси Мелинда билан бирга ташкил этган хайрия жамғармасига (Bill & Melinda Gates Foundation) кўпроқ эътибор бериш учун бу лавозимни тарк этди. Тадбиркор Microsoft директорлар кенгашини 2014 йилгача бошқарган, сўнг бу лавозимни мустақил директор Жон Томпсон эгаллади.

Гейтс Microsoft’нинг тахминан 1 фоиз акцияларига эгалик қилади. Forbes тадбиркорнинг бойлигини 103,6 миллиард долларга баҳолаган. У дунёнинг энг бой одамлари рейтингида иккинчи ўринда (Amazon бош директори Жефф Безосдан сўнг).

Top