Imom Al-Buxoriyning Samarqanddagi yodgorlik majmuasi mutlaqo yangi loyiha asosida barpo etiladi

Prezidentning 2020 yil 2 martdagi “2017-2021 yillarda O‘zbekiston Respublikasini rivojlantirishning beshta ustuvor yo‘nalishi bo‘yicha harakatlar strategiyasini “Ilm, ma'rifat va raqamli iqtisodiyotni rivojlantirish yili”da amalga oshirishga oid davlat dasturi to‘g‘risida”gi PF-5953-sonli farmoni bilan tasdiqlangan Davlat dasturi ijrosini ta'minlash maqsadida hukumat hujjati qabul qilinadi.

Muhokama uchun joylashtirilgan loyihada aytilishicha, prezidentning 2020 yil 2 martdagi “2017-2021 yillarda O‘zbekiston Respublikasini rivojlantirishning beshta ustuvor yo‘nalishi bo‘yicha harakatlar strategiyasini “Ilm, ma'rifat va raqamli iqtisodiyotni rivojlantirish yili”da amalga oshirishga oid davlat dasturi to‘g‘risida”gi PF-5953-sonli farmoni bilan tasdiqlangan Davlat dasturi doirasida Imom Al-Buxoriyning Samarqanddagi yodgorlik majmuasini yangi loyiha asosida qayta barpo etish belgilangan.

O‘zbekiston Respublikasi Qurilish vazirligi (Zokirov) tegishli loyiha tashkilotlarini jalb etgan holda Imom Al-Buxoriyning Samarqanddagi yodgorlik majmuasini musulmon dunyosidagi ulug‘ maqomiga mos ravishda mutlaqo yangi loyiha asosida barpo etilishi yuzasidan loyiha-smeta hujjatlarini ishlab chiqib, O‘zbekiston Respublikasi prezidenti administratsiyasida taqdimot qiladi.

Qurilish vazirligi (Zokirov) Samarqand viloyati hokimligi (Turdimov) bilan birgalikda obekt qurilishi bo‘yicha loyiha tashkilotlari va qurilish-pudrat tashkilotlarini belgilangan tartibda tanlash choralarini ko‘radi.

Moliya vazirligi (Ishmetov), Iqtisodiyot va sanoat vazirligi (Rustamov) obektning qayta barpo etish bo‘yicha ishlab chiqilgan loyiha-smeta hujjatlariga asosan zarur mablag‘larni respublika budjetidan ajratilishini ta'minlaydi.

Belgilab qo‘yilishicha, obektni qayta qurish jarayonida talab etilgan respublikada mavjud bo‘lmagan qurilish materiallarini chetdan olib kelishda bojxona to‘lovlaridan (bojxona rasmiylashtirish yig‘imlaridan tashqari) istisno tariqasida ozod etiladi.