Vodiy boshqa hududlar bilan Bo‘ka-Guliston yo‘li orqali bog‘lanadi

Toshkent viloyati axborot xizmatining Kun.uz'ga ma'lum qilishicha, Andijon, Farg‘ona va Namangan viloyatidan safarga otlangan yengil avtomobillar Bo‘ka-Guliston yo‘li orqali respublikaning boshqa hududlari bilan bog‘lanishi mumkin. 

Bundan avval, Transport vazirligi 2020 yilning 24 mart kuni soat 00:01dan boshlab, Toshkent shahriga kirish va undan chiqish harakati to‘xtatilishini ma'lum qilgandi.

Bunda, Toshkent shahriga kirish va chiqishdagi cheklovlar yuk tashish bilan bog‘liq hollarga, shuningdek, Toshkent shahrida doimiy yashovchi (ro‘yxatdan o‘tgan) shaxslarga Toshkent shahriga kirish uchun tatbiq etilmasligi belgilandi. 

Ta'kidlanishicha, O‘zbekiston Respublikasiga koronavirusning kirib kelishi va tarqalishini oldini olish yuzasidan chora-tadbirlar dasturini tayyorlash bo‘yicha respublika maxsus komissiyasi aholining sanitariya-epidemiologik osoyishtaligini ta'minlash va koronavirus kasalligini respublika hududi bo‘ylab tarqalishi oldini olish maqsadida shunday qarorga kelingan.