Neft qazib olish hajmini qisqartirish bitimi amal qilishdan to‘xtadi

Bitim 2016 yilda neft qazib oluvchi davlatlar tomonidan tuzilgandi. Bu davlatlar 1 apreldan ushbu bitimdan chiqib ketishdi.

Ta'kidlanishicha, neft narxini 3 yil davomida barqaror ushlab turishga imkon bergan Vena pakti koronavirus pandemiyasining “qurbonlari”dan biri bo‘ldi.  

Neft eksport qiluvchi davlatlar tomonidan tuzilgan tarixdagi eng yirik kelishuv 2016 yilda Rossiya OPeK bilan hamkorlik qilishga rozi bo‘lganda tuzilgandi.

O‘shanda Rossiya va Saudiya Arabistoni neft qazib olish hajmini nafaqat ixtiyoriy ravishda qisqartirishga kelisha olishgan, balki bunga OPeKga kirmaydigan o‘nlab davlatlarni jalb qila olishgandi.
 
2017 yildan kelishuv o‘z samarasini bera boshlagan va shundan beri neft narxi 50-70 dollar atrofida saqlanib kelinayotgandi.
 
3 yil ichida bitim parametrlari bir necha bor o‘zgargan, biroq 2020 yil marti boshida uni uzaytirish bo‘yicha muzokaralar muvaffaqiyatsiz yakunlangan. Bu neft narxlarining qulashiga olib kelib, tarixda ilk bor neft narxi bir kun ichida 30 foizga qadrsizlangan va 31 dollarni tashkil qilgan.   
 
Mart oxiriga kelib neft yanada arzonlashib, 22 dollargacha tushib ketdi.

Tahlilchilar fikricha, neft narxi qulashiga OPeK+ bitimi barbod bo‘lgani emas, balki koronavirus pandemiyasi ortida talab mislsiz pasaygani asosiy sabab hisoblanadi.